چنیوٹ (نامہ نگار) چنیوٹ میں غذائی دہشتگردی کا بڑا منصوبہ ناکام بنا دیا گیا۔ ڈی جی فوڈ اتھارٹی کی ہدایت پر جھنگ سرگودھا بائی پاس روڈ پر فوڈ سیفٹی ٹیموں نے کارروائی کرتے ہوئے گاڑی نمبر BKI 146 سے 1800 کلو مردہ مرغیاں برآمد کر لیں، جنہیں فوری طور پر تلف کر دیا گیا۔
غیر قانونی گوشت گاڑی اور لوڈر رکشے کے ذریعے چھ ڈرموں میں چھپا کر سپلائی کیا جا رہا تھا۔ چیکنگ کے دوران ملزمان کے پاس کوئی متعلقہ ریکارڈ موجود نہیں تھا۔ سینئر ویٹرنری اسپیشلسٹ نے موقع پر معائنے کے بعد مرغیاں مضر صحت قرار دیں۔
پولیس نے جعلسازی میں ملوث گاڑی تحویل میں لے لی جبکہ ایک ملزم کو گرفتار کر کے دو افراد کے خلاف تین دفعات کے تحت مقدمہ درج کر لیا گیا۔ ترجمان فوڈ اتھارٹی کا کہنا ہے کہ مردہ اور غیر معیاری گوشت سنگین بیماریوں کا سبب بنتا ہے، ایسے عناصر کسی رعایت کے مستحق نہیں اور ان کے خلاف سخت کارروائی جاری رہے گی۔
