چونیاں:محکمہ سول ڈیفنس کی وجہ سے شہریوں کی زندگیاں داؤ پر لگ گئیں

چونیاں،باغی ٹی وی(عدیل اشرف نامہ نگار)ضلعی انتظامیہ اور محکمہ سول ڈیفنس نے شہریوں کی زندگیاں داؤ پر لگا دیں جگہ جگہ منی پٹرول پمپس اور گیس ری فلنگ شاپس کی بھرمارا سپیشل برانچ کی واضح رپورٹ کے باوجود ضلعی انتظامیہ کرپٹ سول ڈیفنس اہلکاران و افسران کے خلاف کارروائی کرنے سے قاصر۔شہرکی سیاسی، سماجی، فلاحی اور شہری تنظیموں نے وزیراعلیٰ پنجاب محسن نقوی اور چیف سیکرٹری پنجاب سے فوری نوٹس لینے کا مطالبہ کیا ہے۔

تحصیل بھر میں حتیٰ کہ گلی محلوں میں جگہ جگہ منی پٹرول پمپس اور گیس ری فلنگ کی شاپس قائم ہو چکیں ہیں، یہ گورکھ اور خطرناک دھندہ عرصہ دراز سے جاری ہے۔ جب بھی برائے نام کارروائی کی جاتی ہے تو منی پٹرول پمپس اور گیس ری فلنگ شاپس کے مالکان کو بذریعہ موبائل فون میسج پہنچا دیا جاتا ہے لاکھوں روپے منتھلیاں اکٹھی کرنے والے سول ڈیفنس اہلکاروں کے خلاف سپیشل برانچ کچھ عرصہ قبل تفصیلی رپورٹ دے چکی ہے جس میں بتایا گیا تھا کہ کرپٹ اہلکاران تحصیل کے کن کن مقامات سے کتنی منتھلی اکٹھی کرتے ہیں مگر عوامی مسائل میں عدم دلچسپی رکھنے والی ضلعی و تحصیل انتظامیہ نامعلوم وجوہات کی بناء پر کرپٹ سول ڈیفنس اہلکاروں کے خلاف کارروائی کرنے سے گریزاں ہے

اسی طرح سول ڈیفنس اہلکاروں اورپٹرول پمپس مالکان کی ملی بھگت سے شہر بھر کے پٹرول پمپس پر کم پیمانہ اور ایرانی پٹرول کی دھڑلے سے فروخت جاری ہے۔ انتظامیہ کی نااہلی اور کرپٹ سول ڈیفنس اہلکاروں کے باعث شہریوں کو دونوں ہاتھوں سے لوٹا جارہا ہے۔ شہرکی سیاسی، سماجی، فلاحی اور شہری تنظیموں نے وزیراعلیٰ پنجاب محسن نقوی اور چیف سیکرٹری پنجاب سے فوری نوٹس لے کر شہریوں کی زندگیاں داؤ پر لگانے والے ان منی پیٹرول پمپ اور دیگر شاپس کے خلاف فوری طورپر کارروائی کرنے کا مطالبہ کیا ہے۔