جے یو آئی کی جانب سے نو منتخب وزیر اعلیٰ کے انتخاب کا عمل پشاورہائیکورٹ میں چیلنج کر دیا گیا
درخواست جے یو آئی کے رکن خیبرپختونخوا اسمبلی لطف الرحمان کی جانب سے دائر کی گئی،درخواست میں کہا گیا ہے کہ علی امین گنڈاپور کااستعفیٰ منظور نہیں ہوا ،سہیل آفریدی کاانتخابی عمل غیرآئینی ہے،عدالت سہیل آفریدی کے بطور وزیر اعلیٰ کے انتخاب کے عمل کو کالعدم قرار دے،
قبل ازیں پشاور میں میڈیا سے گفتگو کرتے ہوئے لطف الرحمان نے کہا کہ وزیراعلیٰ کا انتخاب غیر قانونی طور پر ہوا ہے، پچھلے وزیراعلیٰ کا استعفیٰ منظور نہیں ہوا، پتا نہیں ان کو کیوں جلدی ہے،گورنر نے علی امین گنڈاپور کو تصدیق کے لیے بلایا ہے، نئے وزیراعلیٰ کے آنے تک پرانا وزیراعلیٰ تو کام کرسکتا ہے،اسپیکر کے کہنے پر ہم نے کاغذات جمع کیے لیکن اجلاس کا بائیکاٹ کیا، گورنر کا خط جب آیا تب ہمیں معلوم ہوا کہ استعفیٰ منظور نہیں ہوا، ہم چاہتے ہیں کہ پچھلے وزیراعلیٰ کا استعفیٰ منظور ہو پھر نیا وزیراعلیٰ منتخب ہو۔
