وزیر صاحب، آگے آئیں! کارکنوں کا علی امین گنڈاپور سے مطالبہ

پاکستان تحریک انصاف (پی ٹی آئی) کے کارکنوں نے وزیراعلیٰ خیبرپختونخوا علی امین گنڈاپور کے خلاف احتجاج کیا ہے، جو قافلے کی قیادت کرنے میں پیچھے رہ گئے۔ علی امین گنڈاپور اور ان کے حامی صبح سویرے راولپنڈی کی جانب ایک احتجاجی قافلے کے ساتھ نکلے، مگر اٹک پہنچتے ہی برہان انٹرچینج پر سیکیورٹی حکام نے کنٹینرز لگا کر ان کا راستہ بند کردیا۔راستے کی بندش پر پی ٹی آئی کارکنوں نے پولیس پر پتھراو کیا، جس کے جواب میں پولیس نے آنسو گیس کی شیلنگ کی۔ اس موقع پر پی ٹی آئی کارکنوں نے وزیراعلیٰ کے خلاف نعرے بازی کی، کہتے ہوئے کہ وہ شیلنگ کا شکار ہو رہے ہیں اور گنڈاپور گاڑی سے باہر نہیں نکل رہے۔
ایک کارکن نے علی امین گنڈاپور سے کہا کہ "وزیر صاحب، آپ آگے آ جائیں، ہم آپ کے پیچھے جائیں گے”۔ اس پر علی امین نے گاڑی سے جواب دیا، "آگے جاؤ، آگے جاؤ”۔ تاہم، کارکنوں کے بار بار کہنے پر وہ بالآخر گاڑی سے نکل آئے اور آگے جانے کے احکامات دیے، لیکن راستے کی بندش کی وجہ سے قافلہ رکا ہوا ہے۔راستے کی بندش کے باعث کئی گاڑیاں واپس خیبرپختونخوا کی جانب روانہ ہو چکی ہیں۔ پی ٹی آئی کے کارکن برہان انٹرچینج کے قریب ایک گھنٹہ سے موجود ہیں اور ان کے پاس کھانے پینے کا کوئی انتظام نہیں، جس کے باعث وہ شدید پریشانی کا شکار ہیں۔ پولیس نے برہان پل پر بڑے کنٹینرز لگا دیے ہیں اور ان کے ٹائرز سے ہوا بھی نکال دی ہے، جس سے قافلے کی مزید پیشرفت میں رکاوٹ پیدا ہو رہی ہے۔