وزیر اعلیٰ خیبرپختونخوا علی امین گنڈاپور نے صحت اور تعلیم کے نظام میں بہتری کے لیے اہم ہدایات جاری کی ہیں۔ انہوں نے ان شعبوں میں اختیارات نچلی سطح پر منتقل کرنے پر زور دیا۔علی امین گنڈاپور کی زیر صدارت محکمہ صحت اور تعلیم کے شعبوں میں اصلاحات کے حوالے سے ایک اہم اجلاس منعقد ہوا۔ اجلاس میں صحت کارڈ کی طرز پر ایجوکیشن کارڈ کے اجرا پر بھی غور و خوض کیا گیا۔وزیر اعلیٰ نے اجلاس میں کہا کہ صحت اور تعلیم کے نظام کو بہتر بنانے کے لیے ضروری ہے کہ اختیارات نچلی سطح پر منتقل کیے جائیں۔ انہوں نے کہا کہ بڑے محکموں کو صوبائی سطح پر بہتر انداز میں چلانا ممکن نہیں ہے۔
وزیر اعلیٰ نے ہدایت دی کہ ریجنل سطح پر ایڈیشنل ڈائریکٹر جنرل تعینات کیے جائیں اور ڈومیسائل کی بنیاد پر بھرتی ہونے والے اساتذہ کو ان کے متعلقہ علاقوں میں تعینات کیا جائے۔ اساتذہ اور پیرا میڈیکل اسٹاف کی ترقی بھی ان کے ڈومیسائل والے علاقوں میں سروس سے مشروط کی جائے۔انہوں نے اس موقع پر کہا کہ سرکاری اسپتالوں میں غیرمستقل طبی آلات کا مکمل ڈیٹا ایک ہفتے میں اکٹھا کیا جائے اور انتظامی عہدوں پر ٹیچنگ کیڈر کے ملازمین کی تعیناتی بند کی جائے۔وزیر اعلیٰ نے مزید ہدایت کی کہ محکمہ صحت اور تعلیم میں ٹیچنگ کیڈر اور مینجمنٹ کیڈر کو الگ رکھا جائے اور کرائے کی عمارتوں میں قائم اسکولوں میں اساتذہ کو کانٹریکٹ پر بھرتی کیا جائے۔ان اصلاحاتی ہدایات کا مقصد خیبرپختونخوا میں صحت اور تعلیم کے نظام کو مضبوط بنانا اور عوام کو بہتر سہولیات فراہم کرنا ہے۔ وزیر اعلیٰ کے ان اقدامات سے امید کی جا رہی ہے کہ صوبے کے دونوں اہم شعبوں میں نمایاں بہتری آئے گی۔
