وزیراعلیٰ پنجاب منتخب ہونے کے بعد حمزہ شہباز شریف نے پنجاب اسمبلی میں خطاب کرتے ہوئے کہا ہے کہ عوام اور حکومت کے درمیان خلا کو ختم کریں گے۔
قائد ایوان منتخب ہونے کے بعد اسمبلی میں خطاب کرتے ہوئے حمزہ شہباز کا کہنا تھاکہ ڈپٹی اسپیکر کی بہادری کو خراج تحسین پیش کرتا ہوں، آج جمہوریت کی فتح ہوئی ہے، ہائیکورٹ نے ڈپٹی اسپیکر کو اختیارات دیے لیکن آج آئین وقانون کا مذاق اڑایا گیا اور ڈپٹی اسپیکرپرحملہ کیا گیا۔
انہوں نے ساتھ دینے پر پی پی کے حسن مرتضیٰ، پی ٹی آئی کے عبد العلیم خان اور جہانگیرترین سمیت دیگر کا شکریہ ادا کیا۔
حمزہ شہباز نے اعلان کیا کہ اتحادیوں کی مدد سے نیا اسپیکر لائیں گے اورڈپٹی اسپیکر پر تشدد پر ایوان کی ان ہاؤس کمیٹی بنانے چاہیے اور آج جو ہوا اس کی بھرپور انکوائری ہونی چاہیے اچھے پولیس افسران اور اچھے بیوروکریٹ لےکرآئیں گے، آج صرف قوم نے توشہ خانے کا حساب مانگا ہے، جب اپنی تلاشی کی باری آتی ہے توکہتےہیں سفارتی تعلقات خراب ہوں گے۔ ہم انتقام نہیں لیں گے لیکن قانون اپنا راستہ اپنائے گا، ہماری حکومت عوامی حکومت ہوگی، عوام اور حکومت کے درمیان خلا کو ہم ختم کریں گے۔
حمزہ شہباز کا مزید کہنا تھا کہ تبدیلی سرکار نے ہمیں چار سال تک پبلک اکاؤنٹس کمیٹی کی سربراہی نہیں دی ہم نے کمیٹیوں کا بائیکاٹ کیا وہ ہمارا جمہوری حق تھا آج اعلان کرتا ہوں کہ ہم پبلک اکاؤنٹس کمیٹی کی چیئرمین شپ اپوزیشن کو دیں گے نواز شریف قائد ہیں انہوں نے مجھ پر اعتماد کیا بینظیر بھٹو اور نواز شریف نے میثاق جمہوریت کیا تھا آج جو ایوان میں ہوا اس کی تحقیقات ہوں گی ۔ہم پنجاب کے تمام ہسپتالوں میں ڈائلیسز مشینوں کو ٹھیک کریں گے مہنگائی نے عوام کا برا حال کر دیا تھا گیس نہیں آتی تھی مگر بل آتا تھا ہم عوام کو ریلیف دینے کی بھر پور کوشش کریں گے
