وزیراعلی پنجاب مریم نوازشریف نے سپیشل افراد کی زندگیوں کو آسان بنانے کے لیے ایک اہم اقدام اٹھایا ہے۔ ان کی ہدایت پر ایک نیا منصوبہ شروع کیا گیا ہے جس کے تحت سپیشل افراد کو معاون آلات فراہم کیے جائیں گے۔
وزیراعلی پنجاب مریم نوازشریف نے اپنے منفرد پروگرام کے ذریعے سپیشل افراد کے لیے معاون آلات کی فراہمی کا آغاز کیا ہے۔ ان آلات میں ویل چیئر اور آلہ سماعت شامل ہیں۔ اس اقدام سے سپیشل افراد کو روزمرہ کی زندگی میں آسانی ہوگی اور ان کی نقل و حرکت میں سہولت پیدا ہوگی۔پنجاب بھر میں نقل و حمل کی صلاحیت سے محروم سپیشل افراد کو ویل چیئرز مفت فراہم کی جائیں گی۔ ویل چیئر کی فراہمی سے ان افراد کی نقل و حرکت میں آسانی ہوگی، جس سے ان کے لیے اپنے ارد گرد کی دنیا سے جڑنا اور روزانہ کے کاموں کو انجام دینا ممکن ہوگا۔
سماعت سے محروم افراد کے لیے خصوصی آلہ سماعت بھی فراہم کیا جائے گا۔ اس آلے کی فراہمی سے ان افراد کی قوت سماعت میں بہتری آئے گی اور ان کی قوت گویائی بھی بہتر ہو سکے گی، جس سے ان کی زندگی میں بڑی تبدیلی آئے گی۔ سپیشل افراد معاون آلات کے لیے آن لائن درخواست دے سکتے ہیں۔ پنجاب حکومت نے ایک پورٹل http://adwc.punjab.gov.pk متعارف کرایا ہے جہاں سپیشل افراد گھر بیٹھے درخواست دے سکتے ہیں۔
سپیشل افراد کو درخواست دینے کے لیے اپنے معذوری کے سرٹیفکیٹ کی ضرورت ہوگی۔ معذور افراد کا شناختی کارڈ، بے فارم اور ڈسٹرکٹ ڈس ایبلٹی اسسمنٹ بورڈ سے جاری کردہ معذوری سرٹیفکیٹ درکار ہوگا۔سپیشل افراد یا ان کے خاندان والے معلومات کے لیے خصوصی ہیلپ لائن 1312 پر کال کر سکتے ہیں۔ اس ہیلپ لائن کے ذریعے انہیں معاون آلات اور دیگر متعلقہ خدمات کی معلومات فراہم کی جائے گی۔ سپیشل افراد اور ان کے خاندانوں کو مزید رہنمائی کے لیے متعلقہ اضلاع میں سوشل ویلفیئر کے ضلعی دفاتر سے بھی مدد مل سکتی ہے۔
وزیراعلی پنجاب مریم نوازشریف کا پیغام
مریم نوازشریف نے کہا ہے کہ "سپیشل افراد بہت سپیشل اور قابل قدر ہوتے ہیں۔ ان کی بحالی اور بہتری کے لیے ہم اپنا عہد ضرور پورا کریں گے۔” انہوں نے مزید کہا کہ "پاکستان کا پہلا سرکاری آٹزم سنٹر پراجیکٹ بھی جلد مکمل ہوگا، جس سے سپیشل افراد کی زندگیوں میں مزید بہتری آئے گی۔”
مریم نوازشریف نے یہ بھی بتایا کہ "ہمت کارڈ کا اجرا سپیشل افراد کو معاشی خود انحصاری کی طرف گامزن کرنے کے لیے کیا گیا ہے، تاکہ وہ اپنے حقوق اور مواقع کا بھرپور فائدہ اٹھا سکیں۔”یہ منصوبہ پنجاب میں سپیشل افراد کی فلاح و بہبود کے لیے ایک اہم قدم ثابت ہوگا اور ان کی زندگیوں میں مثبت تبدیلی لائے گا۔
