وزیراعلیٰ سندھ مراد علی شاہ نے کہا ہے کہ صوبے بھر میں شدید بارشوں اور اچانک سیلاب کے باعث تباہ ہونے والے گھروں کی تعمیر نو کے لیے 15 کھرب روپے درکار ہیں۔
باغی ٹی وی : تفصیلات کے مطابق ایشیائی ترقیاتی بینک (اے ڈی بی) کے ڈائریکٹر جنرل (وسطی اور مغربی ایشیا) یوجینیو زوکوف کے ساتھ ملاقات میںوزیراعلیٰ سندھ نے کہا کہ عالمی بینک نے سیلاب سے متاثرہ مکانات کی تعمیر نو کے لیے ایک کھرب 10 ارب روپے کے قرضے کا وعدہ کیا ہے۔
ایشین ڈیویلپمنٹ بینک سے ڈیڑھ ارب ڈالر مل گئے وزیرخزانہ
وزیراعلیٰ سندھ نے کہا کہ سیلاب کی وجہ سے صوبے میں تقریباً 18 لاکھ مکانات تباہ ہوئے، ابتدائی تخمینوں سے ظاہر ہوتا ہے کہ تعمیر نو کے لیے 15 کھرب روپے درکار ہیں۔
انہوں نے کہا کہ عالمی بینک نے ایک کھرب 10 ارب روپے (50 کروڑ ڈالر) دینے کا وعدہ کیا ہے جبکہ مجموعی طورپر 15 کھرب روپے کی ضرورت ہے، اگر اے ڈی بی 13 کھرب 90 ارب روپے کی کمی کو پورا کرتا ہے تو ہم شکر گزار ہوں گے تاکہ تمام بے گھر افراد کو گھر مہیا کیا جا سکے۔
صوبائی حکومت نے عوام اور نجی شعبوں کے تعاون سے گھروں کی تعمیر شروع کرنے کے لیے ایک کمپنی بھی قائم کی ہے-
پی ٹی آئی لانگ مارچ: عمران خان کا لگژری کنٹینر تیار
اے ڈی بی کے عہدیدار نے وزیراعلیٰ کو بتایا کہ انہوں نے وفاقی حکومت کے ساتھ 47 کروڑ 50 لاکھ ڈالر کا وعدہ کیا ہے جس میں سے 30 کروڑ ڈالر صوبائی حکومت کے لیے تباہ شدہ انفراسٹرکچر کی تعمیر کے لیے ہوگا کراچی سے حیدرآباد تک موٹر وے کی تعمیر نو کے لیے 47 کروڑ 50 لاکھ ڈالر میں سے 10 کروڑ ڈالر نیشنل ہائی وے اتھارٹی کو دیے جائیں گے۔
اے ڈی بی عہدیدار نے کہا کہ بینک موسمیاتی تبدیلی کے اثرات کو کم کرنے کے لیے ایک منصوبہ شروع کرے گا جو کہ اے ڈی بی اور محکمہ پلاننگ اینڈ ڈیولپمنٹ سندھ کے درمیان زیر غور ہے-
