لنڈی کوتل: یاجد اکبر کا پریس کانفرنس میں دعویٰ، "ہماری زمین میں چچازاد حصہ دار نہیں

لنڈی کوتل (باغی ٹی وی رپورٹ) ڈسٹرکٹ خیبر پریس کلب (رجسٹرڈ) میں ایک پریس کانفرنس سے خطاب کرتے ہوئے یاجد اکبر اور راحیل اکبر نے پشاور کے علاقے سربند شینواری قلعہ میں واقع اپنی خاندانی جائیداد کے تنازع پر اپنا مؤقف پیش کیا۔

انہوں نے بتایا کہ ان کے دادا مرحوم محمد اکبر کی جائیداد، جو وراثت انتقال نمبر 1107 سال 2008 کے تحت پانچ بیٹوں اور تین بیٹیوں میں تقسیم ہوئی تھی، اس کے بعد سے کچھ مسائل کا شکار ہے۔

پریس کانفرنس کے دوران یاجد اکبر اور راحیل اکبر نے دعویٰ کیا کہ اکبر خان ولد نسیم اکبر نے اپنے حصے کی زمین فروخت کر کے نقد رقم حاصل کر لی تھی، حالانکہ ان کے چچازادگان نے انہیں بارہا ایسا کرنے سے منع کیا تھا۔ ان کا کہنا تھا کہ نسیم اکبر کے بیٹوں نے ان کی تنبیہ کے باوجود اپنی زمین فروخت کی۔

انہوں نے مزید کہا کہ جاوید اکبر، جمیل اکبر (پسران نعیم اکبر) اور محمد اکبر کی بیٹیوں نے اپنی حصہ اراضی 2022 میں ہارون اور شاہد نامی افراد کو فروخت کر دی اور زر ثمن بھی وصول کر لیا ہے۔ ان کے دیگر چچازادگان، جن میں پرویز اور صدیق اکبر کے بیٹے شامل ہیں، نے بھی اپنی اراضی ہارون اور شاہد کو فروخت کی ہے۔ انہوں نے ہارون اور شاہد کو کاروباری لوگ قرار دیتے ہوئے کہا کہ انہوں نے انتہائی اعتماد کے ساتھ یہ معاملہ طے کیا ہے۔

یاجد اکبر اور راحیل اکبر نے واضح کیا کہ ان کے چچازاد بھائی اکبر خان ولد نسیم اکبر کا ان کے ساتھ کوئی شرعی یا قانونی حصہ نہیں بنتا۔ انہوں نے تمام سرکاری محکموں، قانون نافذ کرنے والے اداروں اور عدالتوں سے اپیل کی کہ وہ ان کے بیانات کی آزادانہ چھان بین کریں، اور انہیں یقین ہے کہ وہ سرخرو ہوں گے۔

پریس کانفرنس کے اختتام پر انہوں نے قانون نافذ کرنے والے اداروں اور بالخصوص ڈی پی او خیبر سے گزارش کی کہ اکبر خان ولد نسیم اکبر کے خلاف دروغ گوئی اور بے جا الزامات لگانے کی پاداش میں قانونی اور سخت تادیبی کارروائی کی جائے۔