حساس اداروں اور سندھ پولیس کے خصوصی ادارے سی ٹی ڈی نے کراچی میں انٹیلیجنس بیسڈ کارروائی کرتے ہوئے چار خطرناک ملزمان کو گرفتار کر لیا ہے۔ گرفتار ملزمان نے ٹرین کے ذریعے فرار ہونے کی کوشش کی تھی لیکن سی ٹی ڈی کی بروقت کارروائی نے ان کا منصوبہ ناکام بنا دیا۔
گرفتار ملزمان میں محمد سجاد عرف شاوو، عبید علی عرف عبیدی، محمد عمیر اصغر اور شکیل احمد شامل ہیں۔ سی ٹی ڈی کے مطابق یہ ملزمان 18 مئی 2025 کو ضلع بدین میں ایک سنگین قتل کے واقعے میں ملوث تھے، جس کا مقدمہ تھانہ بدین میں نمبر 117/2025 کے تحت درج تھا۔کارروائی کے دوران ملزمان کے قبضے سے واردات میں استعمال ہونے والا اسلحہ برآمد کر لیا گیا ہے، جو فرانزک تحقیق کے لیے بھیج دیا گیا ہے۔ ملزمان نے قتل کی واردات سے قبل حیدرآباد میں قیام کیا اور واقعے کی مکمل ریکی بھی کی تھی، جس سے ان کی منصوبہ بندی کا اندازہ ہوتا ہے۔
سی ٹی ڈی حکام کا کہنا ہے کہ قتل کی واردات میں کالعدم علیحدگی تنظیم کے ملوث ہونے کے واضح شواہد بھی حاصل ہوئے ہیں۔ گرفتار ملزمان متعدد سنگین مقدمات میں مطلوب تھے اور ان کا تعلق کالعدم دہشت گرد تنظیم سے بتایا گیا ہے۔گرفتاری تکنیکی شواہد اور باریک بینی سے کی گئی انٹیلیجنس کی بنیاد پر ممکن ہو سکی، جسے سی ٹی ڈی نے اپنی کامیابی قرار دیا ہے۔ سندھ پولیس کے آئی جی نے سی ٹی ڈی کی کارروائی کرنے والی ٹیم کو انعام اور تعریفی اسناد دینے کا بھی اعلان کیا ہے۔سی ٹی ڈی نے کہا ہے کہ مزید تفتیش جاری ہے اور اہم انکشافات جلد منظر عام پر آنے کی توقع ہے، جس سے اس کیس کی گہرائی اور ملزمان کے دیگر ممکنہ ساتھیوں کا پتا چل سکے گا۔
