دنیا کے مشہور مائیکروبلاگنگ پلیٹ فارم ایکس (پہلے ٹویٹر) پر ایک بڑا سائبر حملہ کیا گیا جس کے نتیجے میں سائٹ متعدد بار ڈاؤن ہوئی اور صارفین کو مختلف مسائل کا سامنا کرنا پڑا۔ پاکستان سمیت دنیا بھر کے صارفین کو لاگ ان اور دیگر خدمات میں مشکلات پیش آئیں۔
ڈاؤن ڈیٹیکٹر کی رپورٹ سائٹ کی خرابی کی اطلاعات ٹریکنگ ویب سائٹ ’ڈاؤن ڈیٹیکٹر‘ کے ذریعے سامنے آئیں، جس کے مطابق عالمی سطح پر 40 ہزار سے زائد صارفین نے شکایات درج کیں۔ ان میں ایپ، ویب سائٹ اور سرور کنکشن سے متعلق مختلف مسائل شامل تھے۔ یہ مسائل نہ صرف ایکس کی ویب سائٹ بلکہ موبائل ایپلیکیشن پر بھی ظاہر ہوئے۔
ایلون مسک نے اس سائبر حملے پر ردعمل دیتے ہوئے انکشاف کیا کہ یہ حملہ یوکرین کے علاقے سے منسلک ایک سائبر حملہ تھا۔ فاکس نیوز کے ایک انٹرویو میں انہوں نے کہا کہ ’ہمیں اس حملے کی تفصیلات کا مکمل علم نہیں ہے، لیکن یوکرین کے خطے سے جنریٹ ہونے والے آئی پی ایڈریسز کے ذریعے ایکس کے سسٹم کو نشانہ بنایا گیا ہے۔‘ مسک نے مزید کہا کہ یہ حملہ بہت منظم طریقے سے کیا گیا، اور ممکنہ طور پر کسی بڑی تنظیم یا ملک کی پشت پناہی حاصل ہو سکتی ہے۔
ڈاؤن ڈیٹیکٹر کی رپورٹ کے مطابق، ایکس کی سروس دنیا بھر میں مختلف اوقات میں متاثر ہوئی۔ پہلی بار سہ پہر 3:30 بجے، پھر شام 7 بجے، اور تیسری بار رات 8:44 پر سروس میں خرابی آئی۔ اس دوران پاکستان، بھارت، کینیڈا، برطانیہ اور آسٹریلیا سمیت دنیا کے مختلف ممالک کے صارفین کو مشکلات کا سامنا رہا۔
ابتدائی طور پر ایکس انتظامیہ نے اس مسئلے پر کوئی تبصرہ نہیں کیا جس کی وجہ سے صارفین نے کمپنی پر جوابدہی نہ کرنے کا الزام عائد کیا۔ صارفین کی ناراضگی کا سامنا کرتے ہوئے ایکس انتظامیہ نے بعد میں اس مسئلے پر وضاحت دینے کی کوشش کی، لیکن پہلے کی خاموشی نے صارفین کے خدشات کو مزید بڑھا دیا۔
یہ سائبر حملہ ایک نئی بحث کا آغاز بن گیا ہے کہ سوشل میڈیا پلیٹ فارمز اور ان کے سسٹمز کو کس طرح محفوظ رکھا جائے تاکہ ایسے حملوں کا مقابلہ کیا جا سکے۔
