لاہور(باغی ٹی وی) پنجاب ہائیر ایجوکیشن کمیشن نے سرکاری اور نجی کالجز میں بھارتی گانوں پر ڈانس سمیت غیر اخلاقی اور نازیبا سرگرمیوں پر مکمل پابندی عائد کر دی۔ اس حوالے سے صوبے بھر کے ڈائریکٹر کالجز اور پرنسپلز کو باقاعدہ سرکلر جاری کر دیا گیا ہے، جس میں سختی سے ہدایات دی گئی ہیں کہ ان احکامات کی خلاف ورزی برداشت نہیں کی جائے گی۔
سرکلر کے مطابق پنجاب کے تمام کالجز میں اسپورٹس گالا، فن فئیرز اور دیگر تقریبات میں ڈانس اور بھارتی گانے بجانے پر مکمل پابندی ہوگی۔ اس کے علاوہ، فحش لباس پہننے اور نازیبا جملے بولنے کی بھی سختی سے ممانعت کر دی گئی ہے۔ حکام کا کہنا ہے کہ تعلیمی ادارے طلبہ کے کردار سازی کے مراکز ہیں، جہاں غیر تعلیمی اور غیر اخلاقی سرگرمیوں کی اجازت نہیں دی جا سکتی۔
ہائیر ایجوکیشن کمیشن نے تمام کالجز کی انتظامیہ کو ہدایت کی ہے کہ وہ اپنے اداروں میں تعلیمی اور مثبت سرگرمیوں کو فروغ دیں تاکہ طلبہ کا دھیان صرف تعلیم اور اخلاقی اقدار پر رہے۔ سرکلر میں واضح کیا گیا ہے کہ اگر کسی بھی کالج میں ان احکامات کی خلاف ورزی پائی گئی تو متعلقہ انتظامیہ کے خلاف سخت کارروائی عمل میں لائی جائے گی۔
محکمہ ہائیر ایجوکیشن نے تمام تعلیمی اداروں سے فوری طور پر ان احکامات پر عملدرآمد یقینی بنانے کی ہدایت کی ہے اور متنبہ کیا ہے کہ مستقبل میں اس طرح کی غیر تعلیمی سرگرمیوں کی کوئی گنجائش نہیں ہوگی۔
