سیالکوٹ (باغی ٹی وی، بیوروچیف شاہد ریاض)ڈسکہ میں تھانہ موترہ کے علاقے موترہ کے مقام پر نہر اپر چناب میں نہاتے ہوئے دو نوجوان ڈوب گئے۔ ابتدائی اطلاعات کے مطابق شدید گرمی کے باعث دونوں نوجوان نہانے کے لیے نہر پر آئے تھے اور موترہ پل کے قریب نہاتے ہوئے گہرے پانی میں چلے گئے۔
ریسکیو 1122 نے ڈسٹرکٹ ایمرجنسی آفیسر انجینئر نوید اقبال کی زیر نگرانی فوری طور پر سرچ آپریشن شروع کر دیا ہے۔ ڈوبنے والے نوجوانوں کی شناخت 27 سالہ عطا اللہ اور 19 سالہ رضوان کے نام سے ہوئی ہے، جو کہ آلو مہار گاؤں کے رہائشی اور آپس میں ماموں بھانجا تھے۔
ریسکیو حکام کے مطابق پانی کا بہاؤ تیز ہونے کے باعث سرچ آپریشن میں مشکلات درپیش ہیں، تاہم ریسکیو اہلکاروں کی جانب سے مسلسل کوششیں جاری ہیں تاکہ نوجوانوں کو تلاش کیا جا سکے۔ واقعہ کے باعث علاقے میں افسوس کی فضا قائم ہے۔
