افغان مہاجر باقاعدہ دستاویز کے ساتھ پھر آسکتے ہیں،ترجمان دفتر خارجہ

دفترخارجہ کی ترجمان ممتاز زہرہ بلوچ نے کہا ہے ، کہ ملک میں امن و سلامتی پاکستان کی ذمہ داری ہے، ہمارے پاس افغان دہشت گردوں کی تفصیلات ہیں، غیرقانونی طور پر مقیم غیرملکیوں کے خلاف کارروائی عالمی قوانین کی خلاف ورزی نہیں، پاکستان کو غیرقانونی تارکین وطن کے خلاف ایکشن لینے کا پورا اختیار ہے۔ بے دخل کیے گئے افغانوں کو دوبارہ پاکستان آنے کی اجازت ہوگی۔نجی ٹی وی سے گفتگو کرتے ہوئے ممتاز زہرہ بلوچ نے کہا کہ افغانستان کی سرزمین پاکستان کے خلاف استعمال ہوئی، پاکستان اپنے تحفظات کا اظہار افغان حکومت سے کرچکا ہے، افغان حکومت دہشت گردوں کے خلاف ایکشن لے۔
ممتاز زہرہ بلوچ کا مزید کہنا تھا کہ فیصلے سے افغان حکومت کو آگاہ کردیا تھا، کارروائی صرف غیرقانونی تارکین وطن کے خلاف ہورہی ہے، واپس جانے والے باقاعدہ دستاویز کے ساتھ پھر آسکتے ہیں۔ترجمان دفتر خارجہ نے مغربی ممالک سے 25 ہزار افغانوں کی روانگی کا عمل تیز کرنے کا بھی مطالبہ کیا۔