دیپالپور: یومِ تکبیر پر شاندار ریلی، وطن سے محبت کا بھرپور اظہار

دیپالپور (باغی ٹی وی،نامہ نگارامتیاز شاہین چوہدری) یومِ تکبیر کے موقع پر میونسپل کمیٹی اور سول سوسائٹی کے زیراہتمام پرچم کشائی کی پروقار تقریب اور وطن سے محبت کا بھرپور اظہار کرتے ہوئے شاندار ریلی نکالی گئی۔ ریلی میونسپل کمیٹی دفتر سے مدینہ چوک تک نکالی گئی، جس میں سی او بلدیہ فاروق ارشاد کلاسن، افسران، سول سوسائٹی، صحافیوں اور شہریوں کی بڑی تعداد شریک ہوئی۔

شرکائے ریلی نے "نعرہ تکبیر”، "پاک فوج زندہ باد” اور "پاکستان زندہ باد” کے فلک شگاف نعرے لگائے۔ قومی پرچموں اور بینرز سے سجی اس ریلی نے شہر میں حب الوطنی کا جذبہ تازہ کر دیا۔

اس موقع پر سی او بلدیہ فاروق ارشاد کلاسن نے میڈیا سے گفتگو کرتے ہوئے کہا کہ 28 مئی 1998 کا دن پاکستان کی تاریخ کا وہ ناقابلِ فراموش لمحہ ہے جب وطنِ عزیز نے بھارتی ایٹمی دھماکوں کا دندان شکن جواب دیتے ہوئے عالمِ اسلام کی پہلی اور دنیا کی ساتویں جوہری طاقت بننے کا اعزاز حاصل کیا۔ انہوں نے کہا کہ بلوچستان کے پہاڑوں میں ہونے والے ان سات کامیاب ایٹمی دھماکوں سے دشمن کے ناپاک عزائم خاک میں مل گئے اور وطن عزیز کا دفاع ناقابلِ تسخیر بنا دیا گیا۔

فاروق ارشاد کلاسن نے کہا کہ یومِ تکبیر ہماری قومی حمیت، سائنسی ترقی، عسکری طاقت اور سیاسی قیادت کے جرات مندانہ فیصلے کا دن ہے، جسے پاکستانی قوم ہر سال بھرپور جوش و خروش اور قومی یکجہتی کے ساتھ مناتی ہے۔

ریلی کے شرکاء سے خطاب کرتے ہوئے مذہبی رہنما حافظ حسان صدیقی نے کہا کہ 28 مئی 1998 کو عالمی دباؤ کو مسترد کرتے ہوئے پاکستان نے جوہری دھماکے کیے اور بھارت کو بھرپور جواب دیا۔ یہ کارنامہ اس وقت کی سیاسی قیادت، سائنس دانوں اور مسلح افواج کی قومی خدمت کا عملی ثبوت تھا۔ انہوں نے کہا کہ یومِ تکبیر ہمیں یاد دلاتا ہے کہ سبز ہلالی پرچم تلے متحد ہوکر ہم ملک کے دفاع کو مزید مضبوط بنا سکتے ہیں۔

انہوں نے مزید کہا کہ حالیہ دنوں میں پاک فوج نے "آپریشن بنیانِ مرصوص” کے ذریعے دشمن کی سازشوں کو خاک میں ملا دیا، جو اس بات کا ثبوت ہے کہ آج بھی ہمارا دفاع مضبوط ہاتھوں میں ہے۔

ریلی کے اختتام پر ملک کی سلامتی، ترقی اور استحکام کے لیے خصوصی دعا کی گئی۔ شرکاء نے اس عزم کا اظہار کیا کہ وہ وطن عزیز کے دفاع اور سالمیت کے لیے ہر محاذ پر اپنا کردار ادا کرتے رہیں گے۔