دہشت گرد ملک کی سالمیت کے لئے اعلانیہ خطرہ بن چکے ،حافظ مسعود اظہر

کوئٹہ ریلوے سٹیشن پر خود کش حملہ میں شہید ہونے والوں کے ورثا کے غم میں ہم برابر کے شریک ہیں ۔ دعا گو ہیں کہ اللہ شہدا کی مغفرت فرمائے ، ورثا کو صبر کی توفیق عطا فرمائے اور زخمی ہونے والوں کو صحت عطا فرمائے ۔دہشت گرد انسانیت اور پاکستان کے دشمن ہیں ضروری ہے کہ ان سے آہنی ہاتھ سے نمٹاجائے ۔ ان خیالات کا اظہار پاکستان اسلامک کونسل کے چئیرمین ، امن کمیٹی کے ممبر اور جامعہ سعیدیہ سلفیہ کے پرنسپل ڈاکٹر حافظ مسعود اظہر نے کیا ۔ انھوں نے کہا کہ کوئٹہ ریلوے سٹیشن پر خود کش حملہ درحقیقت پاکستان پر حملہ ہے ۔یہ حملہ سی پیک اور پاکستان کے امن کو تباہ کرنے کی سازش ہے ۔ اس لئے کہ پاک چین دوستی اور سی پیک پاکستان کے دشمنوں کی آنکھوں میں کانٹے کی طرح کھٹک رہے ہیں ۔ قوم دشمنوں کے عزائم کو ناکام بنانے اور ملک کے دفاع کےلئے سکیورٹی اداروں کے شانہ بشانہ ہے ۔ انھو ں نے کہا کہ دہشت گرد انسانیت اور پاکستان کے دشمن ہیں ضروری ہے کہ انھیں نشان عبرت بنایا جائے ، بزدل دہشت گردپاک قوم کا مورال ڈاﺅن کرسکتے ہیں ۔ بم دھماکہ میں شہید اور زخمیوں کے متاثرہ خاندانوں کے غم اور دکھ میں پوری قوم برابر کی شریک ہے ۔ حکومت سے ہمارا مطالبہ ہے کہ دہشت گردوں کو عبرتناک انجا م سے دوچار کرنے کےلئے ریاست کے تمام وسائل بروئے کار لائے جائیں جبکہ شہید اور زخمی ہونے والے خاندانوں کی مالی مدد کی جائے ۔یہ وقت کرسی اور اقتدار کی خاطر لڑنے کا نہیں باہمی اتحاد کا ہے ۔دہشت گردی کے المناک واقعہ نے پوری قوم کو غم زدہ کردیا ہے ۔ ایک طرف ملک میں دہشت گردی بڑھ رہی ہے جبکہ سیاستدان کرسی اور اقتدار کی جنگ لڑرہے ہیں ۔ اگر اس موقع پر ہمارے سیاستدانوں اور حکمرانوں نے ہوشمندی سے کام نہ لیا تو ملک کو ناقابل تلافی نقصان پہنچ سکتا ہے ۔ یہ اختلافات کا نہیں بلکہ باہمی اتحاد اور ملک کو بچانے کا وقت ہے ۔ دہشت گردوں نے یہ پیغام دے دیا ہے کہ وہ پاکستان کی سالمیت کے دشمن ہیں۔ملک میں دہشت گردی کے واقعات مسلسل بڑھتے جارہے ہیں اور دہشت گرد ملک کی سالمیت کے لئے اعلانیہ خطرہ بن چکے ہیں ۔ ان کا مقابلہ باہمی اتحاد اور سکیورٹی اداروں کے شانہ بشانہ کھڑے ہو کرہی کیا جاسکتا ہے