ڈیرہ غازی خان (باغی ٹی وی)بے ہنگم لوڈنگ سے جان لیوا حادثات کا خطرہ، ڈپٹی کمشنر ڈی جی خان کا سخت نوٹس،موٹر سائیکل ریڑھیوں سے لمبا سریا، ٹی آئرن اور گارڈر اتروایا، ٹریفک پولیس اور دکان مالکان کے خلاف کارروائی کی ہدایت
ڈپٹی کمشنر ڈیرہ غازی خان محمد عثمان خالد نے دوران سفر مانکا کینال کے قریب موٹر سائیکل ریڑھیوں پر بے ہنگم طریقے سے لوڈ کیے گئے لمبے سریے، ٹی آئرن اور گارڈر دیکھ کر فوری نوٹس لیا اور اپنی گاڑی روک کر موقع پر موجود ریڑھی سواروں کو روک لیا۔ انہوں نے مقامی پولیس کو طلب کر کے خطرناک انداز میں لے جائے جا رہے تعمیراتی سامان کو فوری طور پر اتروایا اور ہدایت کی کہ یہ سامان صرف محفوظ گاڑیوں کے ذریعے منتقل کیا جائے۔
ڈپٹی کمشنر نے کہا کہ موٹر سائیکل ریڑھیوں پر اس طرح کا بے احتیاط لوڈ عوام کے لیے جان لیوا خطرہ بن سکتا ہے، کیونکہ سڑکوں پر لمبے سریے تیز رفتاری میں تیر کا کام کرتے ہیں اور پیدل یا موٹر سائیکل سوار کسی بھی وقت مہلک حادثے کا شکار ہو سکتے ہیں۔ انہوں نے انسانی جان کو سب سے قیمتی قرار دیتے ہوئے واضح کیا کہ ایسی غفلت ناقابل برداشت ہے۔
انہوں نے ٹریفک پولیس کو ایکسل لوڈ مینجمنٹ کی خلاف ورزی کرنے والے ریڑھی ڈرائیوروں کے خلاف قانونی کارروائی کی ہدایت کی، جبکہ ایسے سامان فروخت کرنے والے دکان مالکان کے خلاف بھی قانونی کارروائی کے احکامات جاری کیے۔
ڈپٹی کمشنر نے شہریوں سے اپیل کی کہ تعمیراتی سامان کی ترسیل میں احتیاط برتیں تاکہ قیمتی جانوں کا تحفظ یقینی بنایا جا سکے۔
