ڈیرہ غازی خان (باغی ٹی وی، نیوز رپورٹر شاہد خان) عالمی یوم ماحولیات کے موقع پر ڈیرہ غازی خان میں ایک بھرپور آگاہی واک کا انعقاد کیا گیا، جس کی قیادت رکن پنجاب اسمبلی محمد حنیف پتافی، ڈپٹی کمشنر محمد عثمان خالد اور ڈی پی او سید علی نے کی۔ واک میں شہریوں، دکانداروں، تاجر تنظیموں، وکلاء، سیاسی و سماجی رہنماؤں، سول سوسائٹی، اور مختلف محکموں کے افسران و ملازمین نے شرکت کی۔
اس موقع پر شہریوں میں ماحولیاتی تحفظ سے متعلق پمفلٹس اور کپڑے سے تیار ماحول دوست بیگز تقسیم کیے گئے۔ رکن اسمبلی محمد حنیف پتافی نے شرکاء سے خطاب کرتے ہوئے کہا کہ ہمیں ماحولیاتی آلودگی پر قابو پانے کے لیے پلاسٹک بیگز کا استعمال ترک کرنا ہوگا کیونکہ یہ سیوریج کی بندش اور ماحولیاتی مسائل کا سبب بنتے ہیں۔ انہوں نے خبردار کیا کہ آلودگی کا باعث بننے والی دیگر سرگرمیوں کے خلاف بھی کارروائی کی جائے گی۔
ڈپٹی کمشنر محمد عثمان خالد نے کہا کہ عالمی یوم ماحولیات منانے کا مقصد نئی نسل کو صاف ستھرا ماحول فراہم کرنا ہے۔ انہوں نے زور دیا کہ اینٹوں کے بھٹوں، صنعتی اداروں اور گاڑیوں سے خارج ہونے والے دھوئیں کے خاتمے کے لیے مؤثر اقدامات کیے جائیں۔
ڈی پی او سید علی نے کہا کہ ماحولیاتی آلودگی پھیلانے والی گاڑیوں کے خلاف قانون کے تحت کارروائی جاری ہے۔ ڈپٹی ڈائریکٹر انجینئر اشفاق احمد کے مطابق محکمہ ماحولیات کی جانب سے شہریوں میں شعور اجاگر کرنے کے لیے کپڑے کے تھیلے اور آگاہی مواد تقسیم کیا جا رہا ہے۔
اسسٹنٹ ڈائریکٹر لیبر محمد صادق نے بتایا کہ لیبر منسٹر فیصل ایوب کھوکھر کی ہدایت پر صنعتی اداروں میں ہیلتھ اور سیفٹی مہم کا آغاز کر دیا گیا ہے۔ آئندہ ہفتے سے ہر فیکٹری میں سیفٹی آلات کی موجودگی اور ان کے استعمال کا جائزہ لیا جائے گا اور خلاف ورزی پر سخت کارروائی عمل میں لائی جائے گی۔
آگاہی واک نے شہریوں میں ماحولیاتی شعور بیدار کرنے میں اہم کردار ادا کیا اور پیغام دیا کہ محفوظ اور صاف ماحول ہم سب کی مشترکہ ذمہ داری ہے۔
