وزیر دفاع کی برطرفی نیتن یاہو کو مہنگی پڑ گئی

تل ابیب: اسرائیلی وزیراعظم کی جانب سے وزیر دفاع یواف گیلانٹ کی برطرفی کے خلاف اسرائیل کے مختلف شہروں میں مظاہرے پھوٹ پڑے ہیں۔

باغی ٹی وی: اسرائیلی میڈیا کے مطابق یواف گیلانٹ کی برطرفی کے خلاف تل ابیب، نہاریہ، حیفا اور مقبوضہ بیت المقدس سمیت مختلف شہروں میں ہزاروں افراد نے احتجاجی مظاہرے کیے، مظاہرین نے وزیراعظم کے خلاف سخت نعرے بازی کی، اور ہزاروں مظاہرین نے سڑکیں بلاک کر کے جلاؤ گھیراؤ بھی کیا مظاہرین کا کہنا تھا کہ انہیں خطرہ ایران یا حزب اللہ سے نہیں، بلکہ اپنی حکومت سے ہے۔

اسرائیلی پولیس نے احتجاج کے دوران مظاہرین کو منتشر کرنے کے لیے واٹر کینن کا استعمال کیا، جبکہ 40 اسرائیلیوں کو بھی گرفتار کیا گیا،یہ مظاہرے اس بات کی نشاندہی کرتے ہیں کہ عوام حکومت کی پالیسیوں اور فیصلوں کے خلاف اپنے تحفظات کا اظہار کرنے کے لیے تیار ہیں، خاص طور پر جب ملک ایک مشکل دور سے گزر رہا ہے۔

واضح رہے کہ اسرائیلی وزیراعظم بن یامین نیتن یاہو نے جنگ کے دوران وزیر دفاع یواف گیلانٹ کو برطرف کر دیا تھا۔ یواف گیلانٹ کی جگہ موجودہ وزیر خارجہ اسرائیل کاٹز وزارت دفاع کا قلمدان سنبھالیں گے، وزیراعظم کے دفتر سے جاری خط میں یواف گیلانٹ کو یہ اطلاع دی گئی کہ اس خط کی وصولی کے 48 گھنٹے بعد وہ وزیر دفاع کے عہدے سے برطرف ہو جائیں گے نیتن یاہو نے کہا کہ جنگ کے ابتدائی دنوں میں ہمارے درمیان اعتماد تھا، لیکن گزشتہ کچھ مہینوں میں وہ اعتماد ختم ہو چکا ہے۔“ اس بیان نے حکومت میں موجود کشیدگی اور عوامی عدم اعتماد کی عکاسی کی ہے، جو کہ ملک کے موجودہ سیکیورٹی حالات میں بڑی اہمیت رکھتا ہے۔