ڈیرہ غازی خان (باغی ٹی وی رپورٹ) وفاقی محتسب کے ریجنل ہیڈ ڈاکٹر محمد زاہد ملک کی جانب سے 13 مئی 2025 کو عوامی شکایات پر فوری اور موثر فیصلے کرتے ہوئے شہریوں کو بڑا ریلیف فراہم کیا گیا۔ ڈاکٹر زاہد نے مختلف شکایات پر کارروائی کرتے ہوئے ایک ہی دن میں 150 سے زائد مقدمات کے فیصلے کیے، جن کے نتیجے میں متاثرہ شہریوں کو 7 لاکھ روپے سے زائد کا ریلیف دیا گیا۔ اس اہم کارکردگی کا مظاہرہ وفاقی محتسب کے اس اصول کی عکاسی کرتا ہے کہ عام اور بے بس شہریوں کو بغیر کسی سفارش، وکیل یا فیس کے فوری اور منصفانہ انصاف فراہم کیا جائے۔
ڈیرہ غازی خان میں شاہ صدر دین کے علاقے بستی کو چھہ کوکاری مرزے والا کے مکین ایک ماہ تک بجلی کی بندش کے عذاب میں مبتلا رہے، جب میپکو کے ایس ڈی او نے بجلی چوری کے الزام میں ان کا ٹرانسفارمر ہٹا دیا۔ شدید گرمی میں بجلی نہ ہونے سے مکینوں کی زندگی اجیرن ہو گئی اور انہیں مچھروں اور دیگر مسائل کا سامنا کرنا پڑا۔ غریب اور محنت کش افراد پر مشتمل اس بستی کے مکین اس غیر منصفانہ کارروائی سے پریشان حال تھے۔
ان حالات سے تنگ آکر بستی کے 16 افراد نے وفاقی محتسب کے ریجنل دفتر ڈیرہ غازی خان میں انصاف کے لیے درخواست دائر کی۔ انہوں نے اپنی درخواست میں میپکو کی اس کارروائی کو غیر منصفانہ قرار دیتے ہوئے فوری انصاف کا مطالبہ کیا۔ درخواست گزاروں نے بجلی کی عدم دستیابی سے اپنے روزمرہ کے معمولات اور بچوں کی تعلیم پر پڑنے والے منفی اثرات سے آگاہ کیا۔
وفاقی محتسب کے ریجنل ہیڈ ڈاکٹر محمد زاہد نے فوری طور پر سماعت کا اہتمام کیا اور میپکو حکام سمیت تمام متعلقہ فریقین کو طلب کیا۔ انہوں نے بغیر کسی وکیل، سفارش یا فیس کے ایک ماہ کے اندر سماعت مکمل کی اور بستی میں فوری طور پر ٹرانسفارمر لگانے کا حکم دیا۔اس کے مزید کئی کیسوں کے فیصلے بھی کئے جن میں میپکو کی جانب سے جاری کردہ ناجائز ڈیٹیکشن بلز کو بھی منسوخ کر نے کے احکامات بھی جاری کئے۔
سماعت کے دوران ریجنل ہیڈ ڈاکٹر محمد زاہد نے میپکو حکام کو سخت تنبیہ کی کہ وہ عوام کو ناحق تنگ کرنے سے باز رہیں۔ انہوں نے زور دیا کہ وفاقی محتسب کا ادارہ غریب اور نادار لوگوں کی آخری امید ہے اور یہ "غریبوں کی عدالت” ہے جہاں انصاف صرف سچائی کی بنیاد پر کیا جاتا ہے۔
وفاقی محتسب کے اس فیصلے سے بستی کو چھہ کوکاری کے مکینوں کی زندگی میں روشنی لوٹ آئی ہے۔ ٹرانسفارمر کی بحالی سے بجلی کی فراہمی ممکن ہوئی اوردیگر شہریوں کے ناجائز بلز کی منسوخی سے ان پر سے مالی بوجھ کم ہوا۔ مکینوں نے وفاقی محتسب کے ادارے اور ڈاکٹر محمد زاہد کی فوری اور منصفانہ کارروائی کو سراہا۔ یہ واقعہ وفاقی محتسب کے اہم کردار کو اجاگر کرتا ہے، جو عام شہریوں کے لیے انصاف کی ایک مضبوط آواز ہے۔ اس فیصلے نے ثابت کیا کہ انصاف تک رسائی ہر شہری کا حق ہے۔ بستی کے مکینوں نے اس فیصلے کو اپنی فتح قرار دیتے ہوئے وفاقی محتسب کا شکریہ ادا کیا۔
