ڈیرہ غازی خان (باغی ٹی وی، سٹی رپورٹر جواد اکبر) کوئٹہ روڈ پر بڑھتے ہوئے حادثات شہریوں کے لیے شدید پریشانی کا باعث بن چکے ہیں۔ گزشتہ ہفتے ڈیرہ سخی سرور روڈ پر ایک افسوسناک حادثے میں نجی تعلیمی ادارے کی وین کی ٹرک سے ٹکر کے نتیجے میں پرنسپل سمیت چار افراد جاں بحق جبکہ متعدد اساتذہ شدید زخمی ہوگئے۔ حادثے کی بنیادی وجوہات میں تیز رفتاری اور اوور لوڈ گاڑیوں کی بے قابو نقل و حرکت شامل ہیں۔
عوامی اور سماجی حلقوں نے اس تشویش ناک صورتحال پر حکومت سے مطالبہ کیا ہے کہ بین الصوبائی کوئٹہ روڈ کو دو رویہ بنایا جائے تاکہ حادثات کی روک تھام ممکن ہو سکے۔ اس کے ساتھ ساتھ پنجاب ہائی وے پولیس سے رفتار کی مؤثر نگرانی کا بھی مطالبہ کیا گیا ہے۔
