ڈیرہ غازی خان (باغی ٹی وی، نیوز رپورٹر شاہد خان) انٹرمیڈیٹ پارٹ فرسٹ کے سالانہ امتحانات 20 مئی سے شروع، رولنمبر سلپس جاری
تعلیمی بورڈ ڈیرہ غازی خان کے زیر اہتمام انٹرمیڈیٹ پارٹ فسٹ کا پہلا سالانہ امتحان 20 مئی 2025ء سے شروع ہونے جا رہا ہے۔ کنٹرولر امتحانات مظفر حسین کے مطابق تمام پرائیویٹ امیدواروں کو رولنمبر سلپس ان کے داخلہ فارمز پر درج پتوں پر بذریعہ رجسٹری ارسال کر دی گئی ہیں جبکہ ریگولر امیدواروں کی سلپس ان کے متعلقہ تعلیمی اداروں کے پورٹل پر اپ لوڈ کر دی گئی ہیں جہاں سے وہ پرنٹ نکال سکتے ہیں۔
انہوں نے بتایا کہ جن امیدواروں کی رولنمبر سلپس کوائف یا بقایاجات مکمل نہ ہونے کی وجہ سے روکی گئی ہیں، انہیں اعتراضاتی خطوط ارسال کیے جا چکے ہیں۔ ایسے امیدوار فوری طور پر اعتراضات دور کرکے اپنی سلپس حاصل کریں۔ مزید کہا گیا کہ اگر کسی پرائیویٹ امیدوار کو 17 مئی تک رولنمبر سلپ موصول نہ ہو تو وہ بورڈ آفس سے رجوع کرے یا ویب سائٹ www.bisedgkhan.edu.pk سے خود ڈاؤن لوڈ کر لے۔
کنٹرولر امتحانات نے واضح کیا کہ اگر کوئی امیدوار رولنمبر سلپ نہ ہونے کے باعث امتحان میں شریک نہ ہو سکا تو اس کی تمام تر ذمہ داری اسی امیدوار پر عائد ہو گی، تعلیمی بورڈ اس کا ذمہ دار نہ ہو گا۔
