ڈی جی خان: ستھرا پنجاب پروگرام پر عملدرآمد کے لیے اہم اجلاس
ڈیرہ غازی خان،باغی ٹی وی(سٹی رپورٹر جواد اکبر) ستھرا پنجاب پروگرام پر عملدرآمد کے لیے اہم اجلاس
کمشنر ڈی جی خان ڈویژن ڈاکٹر ناصر محمود بشیر کی زیر صدارت ستھرا پنجاب پروگرام کے معاملات کا جائزہ لینے کے لیے ویڈیو لنک اجلاس منعقد ہوا۔ اجلاس میں سینیٹر حافظ عبد الکریم نے خصوصی شرکت کی، جبکہ ڈپٹی کمشنرز اور متعلقہ افسران بھی موجود تھے۔
کمشنر ڈاکٹر ناصر محمود بشیر نے ہدایت دی کہ ستھرا پنجاب پروگرام کو "آؤٹ سورس” کرنے تک صفائی مہم کو جاری رکھا جائے۔ ڈی جی خان سالڈ ویسٹ مینجمنٹ کمپنی اور تمام میونسپل کمیٹیوں کو 30 دسمبر تک مشینری اور افرادی قوت متعلقہ کمپنی کے حوالے کرنے کے احکامات دیے گئے۔
انہوں نے زور دیا کہ شہروں اور دیہاتوں میں صفائی کے لیے ون ٹائم جامع مہم اور دیگر مراحل کو مقررہ ٹائم لائنز کے تحت مکمل کیا جائے۔ کمشنر نے کہا کہ ہر گاؤں کو شہروں کے مساوی صاف کرنے کے لیے اقدامات کیے جائیں گے اور وزیر اعلیٰ پنجاب مریم نواز شریف کے "زیرو ویسٹ” وژن کو عملی جامہ پہنانے کے لیے ٹیم ورک کو یقینی بنایا جائے۔
اجلاس میں صفائی کے معیار کو بہتر بنانے کے لیے مختلف تجاویز پر غور کیا گیا اور متعلقہ اداروں کو فوری عملدرآمد کی ہدایت دی گئی۔
