سعد فاروق
پاک فوج کے ترجمان لیفٹیننٹ جنرل احمد شریف چوہدری نے کہا ہے کہ بھارتی جارحیت کا بھرپور اور مؤثر جواب دیتے ہوئےافواجِ پاکستان نے قوم سے کیا گیا وعدہ پورا کر دکھایا۔
باغی ٹی وی کے مطابق پاکستان ایئر فورس اور نیوی کے اعلیٰ افسران کے ہمراہ ایک اہم پریس کانفرنس کرتے ہوئے ڈی جی آئی ایس پی آر نے بتایا کہ 6 اور 7 مئی کو بھارت کی جانب سے کی گئی جارحانہ کارروائی میں معصوم شہریوں کی شہادت کے بعد، پاکستان نے دشمن کے خلاف آپریشن ’بنیان مرصوص‘ کا آغاز کیا۔ اس جوابی کارروائی میں دشمن کو بھاری جانی و مالی نقصان پہنچایا گیا۔پاکستان کی بہادر عوام نے اپنی افواج کے شانہ بشانہ کھڑے ہو کر اتحاد و یکجہتی کی مثال قائم کی۔ ہماری تمام ہمدردیاں شہدا کے خاندانوں کے ساتھ ہیں، اور پاکستانی نوجوانوں نے انفارمیشن وار میں ہر اول دستے کا کردار ادا کیا۔ اللہ کا شکر ہے کہ اس نے ہمیں فتح عطا کی۔”
بھارت میں دہشتگردی کے مراکز پر کارروائی
ڈی جی آئی ایس پی آر نے کہا کہ پاکستان نے ان 26 بھارتی تنصیبات کو کامیابی سے نشانہ بنایا جو براہ راست پاکستان میں دہشتگردی پھیلانے، ریاست مخالف عناصر کو سپورٹ کرنے، اور معصوم شہریوں پر حملوں میں استعمال ہو رہی تھیں۔ یہ تنصیبات دہشتگردوں کے تربیتی مراکز، کمانڈ اینڈ کنٹرول بیسز، اور وہ مراکز تھے جہاں سے پاکستان کے خلاف خفیہ کارروائیوں کی منصوبہ بندی کی جاتی تھی۔ڈی جی آئی ایس پی آر نے واضح کیا کہ ان کارروائیوں کا مقصد صرف جواب دینا نہیں تھا بلکہ پاکستان کے تحفظ کو یقینی بنانا اور آئندہ کسی بھی مہم جوئی کو روکنا تھا۔
انہوں نے کہا کہ یہ ہدفی کارروائیاں عالمی قوانین کے دائرے میں رہتے ہوئے کی گئیں، اور دنیا نے دیکھ لیا کہ پاکستان نے نہ صرف اپنے دفاع کا حق استعمال کیا بلکہ دہشتگردی کے اصل منبع کو نشانہ بنایا۔ڈی جی آئی ایس پی آر نے مزید کہا کہ پاکستان اپنے عوام کی سلامتی پر کوئی سمجھوتہ نہیں کرے گا، اور ہر دشمن سازش کا مؤثر جواب دیا جائے گا۔
بھارت کا ایس-400 دفاعی نظام تباہ
ڈی جی آئی ایس پی آر نے اپنی پریس بریفنگ میں کہا کہ پاک فضائیہ نے دشمن کے سب سے جدید اور مہنگے سمجھے جانے والے دفاعی نظام "ایس-400” کو دو مختلف مقامات پر مؤثر طریقے سے نشانہ بنایا۔ یہ کارروائی نہ صرف پاکستان کی تکنیکی برتری کا ثبوت ہے بلکہ دشمن کو واضح پیغام ہے کہ پاکستان اپنے دفاع کی مکمل صلاحیت رکھتا ہے۔ ایس-400 جیسے نظام کو نشانہ بنانا معمولی بات نہیں، مگر ہماری فضائیہ نے یہ کارنامہ اپنی مہارت، جرات اور جدید ٹیکنالوجی کی مدد سے انجام دیا۔
ڈی جی آئی ایس پی آر نے مزید کہا کہ اس کامیابی نے دشمن کے اعتماد کو شدید نقصان پہنچایا ہے اور ثابت کر دیا ہے کہ پاکستان ہر محاذ پر کسی بھی مہم جوئی کا جواب دینے کی مکمل صلاحیت رکھتا ہے۔لیفٹیننٹ جنرل احمد شریف چوہدری نے مزید انکشاف کیا کہ پاک افواج نےبھارت اور مقبوضہ کشمیر میں 26 فوجی اہداف کو کامیابی سے نشانہ بنایا،سورت گڑھ، سرسہ، آدم پور، اونتی پورہ اور پٹھان کوٹ میں دشمن کے اہم فوجی مراکز کو نقصان پہنچایا،ایس-400 ائیر ڈیفنس سسٹم کی دو تنصیبات کو کامیابی سے تباہ کیا اوربھارت کی جانب سے ڈرون کے ذریعے فضائی حدود کی خلاف ورزی کا بھی مؤثر جواب دیا.
قومی خودمختاری پر کوئی سمجھوتہ ممکن نہیں
ڈی جی آئی ایس پی آر نے ایک اہم پریس بریفنگ کے دوران واضح اور دوٹوک الفاظ میں کہا کہ پاکستان کی خودمختاری اور سلامتی پر کسی قسم کی آنچ برداشت نہیں کی جائے گی۔ اگر کسی جانب سے جارحیت یا سرحدی خلاف ورزی کی کوشش کی گئی تو اس کا فوری، بھرپور اور مؤثر جواب دیا جائے گا۔ان کا کہنا تھا کہ پاکستان ایک پُرامن ملک ہے اور ہم خطے میں امن و استحکام کے خواہاں ہیں، لیکن ہماری امن پسندی کو کمزوری نہ سمجھا جائے۔ دشمن کو یہ بات ذہن نشین کر لینی چاہیے کہ پاکستان نہ صرف اپنے دفاع کی مکمل صلاحیت رکھتا ہے بلکہ ہر سطح پر مؤثر جواب دینے کی طاقت اور حوصلہ بھی رکھتا ہے۔
ڈی جی آئی ایس پی آر نے کہا کہ مسلح افواج ہر وقت چوکس اور تیار ہیں، جبکہ پوری قوم کی حمایت ان کے لیے سب سے بڑی طاقت ہے۔ انہوں نے خبردار کیا کہ اگر کسی نے پاکستان کی زمینی، فضائی یا سمندری حدود کی خلاف ورزی کی، تو اسے ناقابلِ تلافی نقصان کا سامنا کرنا پڑے گا۔ انہوں نے زور دے کر کہا کہ پاکستان کی خودمختاری ہمارے لیے مقدس ہے، اور اس پر کوئی سمجھوتہ یا سودے بازی ممکن نہیں۔
قوم، میڈیا اور قیادت کو خراج تحسین
ڈی جی آئی ایس پی آر نے کہا کہ 6 اور 7 مئی کو بھارتی جارحیت کے نتیجے میں بچوں اور عورتوں سمیت بے گناہ شہری شہید ہوئے، جو بھارت کے جنگی جرائم کا منہ بولتا ثبوت ہے۔ انہوں نے کہا کہ پاکستان کی عوام نے ان حالات میں پاک فوج کے ساتھ "بنیان مرصوص” کی طرح یکجہتی دکھائی، جو ہماری اصل قوت ہے۔ اسی طرح پاکستان کا قومی میڈیا بھارتی جھوٹ اور پروپیگنڈے کے سامنے سیسہ پلائی دیوار بنا رہا، اور سچ کو اجاگر کیا۔
ڈی جی آئی ایس پی آر نے وزیراعظم شہباز شریف اور وفاقی وزراء کا بھی شکریہ ادا کیا جنہوں نے مشکل وقت میں اہم اور بروقت فیصلے کیے۔ انہوں نے کہا کہ پاکستان کی مسلح افواج، عوام، قیادت اور میڈیا کے باہمی اعتماد اور اتحاد نے دشمن کے تمام عزائم کو خاک میں ملا دیا۔
سہ فریقی ملاقات،افغانستان کا پاکستان اور چین سے ’باہمی احترام اور تعمیری روابط‘ کا مطالبہ
پاکستان کی تاریخی دفاعی فتح پر عالمی میڈیا حیران
بھارتی ایئر مارشل کا رافیل طیارے گرائے جانے کے سوال کا گول مول جواب
پاکستان کی تاریخی فتح پر واہگہ بارڈر پر جشن، بھارت پریڈ سے بھی بھاگ گیا
