ڈیرہ غازیخان(باغی ٹی وی رپورٹ) ڈاکوؤں سے مقابلے میں شہید اے ایس آئی غلام شبیر اور کانسٹیبل غلام فرید کی نماز جنازہ سرکاری اعزاز کے ساتھ ادا، اعلیٰ حکام کی شرکت
تفصیل کے مطابق تھانہ صدر تونسہ کی حدود میں ڈاکوؤں سے مقابلے کے دوران جامِ شہادت نوش کرنے والے اے ایس آئی غلام شبیر اور کانسٹیبل غلام فرید کی نماز جنازہ پولیس لائنز ڈیرہ غازیخان میں مکمل سرکاری اعزاز کے ساتھ ادا کر دی گئی۔ پولیس کے چاک و چوبند دستے نے شہداء کو سلامی پیش کی، جبکہ قومی پرچم میں لپٹے جسدِ خاکی پر اعلیٰ افسران نے پھولوں کی چادر چڑھائی۔
نماز جنازہ میں ایڈیشنل آئی جی ساؤتھ پنجاب محمد کامران خان، آر پی او ڈی جی خان کیپٹن (ر) سجاد حسن خان، کمشنر اشفاق احمد چوہدری، ڈی پی او سید علی، ڈپٹی کمشنر عثمان خالد، رینجرز، پولیس، انتظامیہ، بار ایسوسی ایشن، پریس کلب کے نمائندگان، سیاسی و سماجی رہنماؤں، شہریوں اور شہداء کے لواحقین کی بڑی تعداد نے شرکت کی۔ اس موقع پر سکیورٹی اداروں کے سربراہان بھی موجود تھے۔
ایڈیشنل آئی جی محمد کامران خان نے شہداء کے لواحقین سے ملاقات کی، ان سے اظہار تعزیت کیا اور شہداء کی قربانی کو زبردست خراجِ عقیدت پیش کرتے ہوئے کہا کہ یہ خون رائیگاں نہیں جائے گا، جرائم پیشہ عناصر کے خلاف کارروائیاں مزید تیز کی جائیں گی۔ آر پی او سجاد حسن خان نے شہداء کو پولیس فورس کا فخر قرار دیتے ہوئے کہا کہ پنجاب پولیس قیامِ امن کے لیے ہر قربانی دینے کو تیار ہے، اور شہداء کے بچوں کی مکمل کفالت کی جائے گی۔
نماز جنازہ کی ادائیگی کے بعد شہداء کے جسد خاکی کو مکمل سرکاری اعزاز کے ساتھ ان کے آبائی علاقوں روانہ کیا گیا، جہاں تدفین عمل میں لائی جائے گی۔ شہید اے ایس آئی غلام شبیر نے سوگواران میں بیوی اور پانچ بچے، جبکہ شہید کانسٹیبل غلام فرید نے بیوی اور دو بیٹیاں چھوڑی ہیں۔
