ڈیرہ غازی خان (باغی ٹی وی، سٹی رپورٹر جواد اکبر)ڈپٹی کمشنر محمد عثمان خالد کی ہدایت پر ضلعی انتظامیہ نے فوری کارروائی کرتے ہوئے مانکا کینال سے مردہ جانور کا مضر صحت گوشت برآمد کر لیا۔ کارروائی محکمہ لائیو اسٹاک اور فوڈ اتھارٹی کی مشترکہ ٹیم نے اسسٹنٹ کمشنر ہیڈ کوارٹر نذر حسین کورائی کی نگرانی میں کی، تاہم ملزم موقع سے فرار ہونے میں کامیاب ہو گیا۔
برآمد شدہ گوشت کو فوری طور پر ضبط کر کے غازی گھاٹ کے مقام پر دریائے سندھ میں تلف کر دیا گیا۔ ڈپٹی کمشنر محمد عثمان خالد نے اس موقع پر واضح کیا کہ انسانی صحت سے کھیلنے والے عناصر کے خلاف سخت قانونی کارروائی کی جائے گی۔ شہریوں سے اپیل کی گئی ہے کہ وہ مضر صحت یا مشکوک گوشت کی فروخت کی صورت میں فوری طور پر ضلعی انتظامیہ یا متعلقہ محکموں کو اطلاع دیں تاکہ بروقت کارروائی ممکن بنائی جا سکے۔
