ڈیرہ غازی خان،باغی ٹی وی(سٹی رپورٹرجواداکبر) بھارت کی حالیہ جارحیت کے پیش نظر ضلع ڈیرہ غازی خان کے تمام اداروں کو ہائی الرٹ کر دیا گیا ہے، جب کہ کسی بھی ہنگامی یا غیر معمولی صورتحال سے مؤثر طور پر نمٹنے کے لیے ریسکیو 1122 کے مرکزی اسٹیشن پر فرضی مشق (موک ایکسرسائز) کا انعقاد کیا گیا۔ ڈپٹی کمشنر ڈیرہ غازی خان محمد عثمان خالد نے خود موقع پر جا کر مشق کی نگرانی کی اور تیاریوں کا جائزہ لیا۔
اس مشق میں ملبے تلے دبے افراد کو نکالنے، آگ بجھانے، زخمیوں کو ابتدائی طبی امداد دینے، فیلڈ اسپتال کے قیام، ایمبولینس سروس کے ذریعے زخمیوں کو قریبی مراکز صحت تک منتقل کرنے، اسپتالوں میں ادویات کی دستیابی، ڈاکٹروں اور پیرا میڈیکل اسٹاف کی موجودگی سمیت دیگر اہم امور کو عملی طور پر جانچا گیا۔
ڈپٹی کمشنر نے کہا کہ سول ڈیفنس، بم ڈسپوزل اسکواڈ، ہیلتھ اور دیگر محکمے باہمی تعاون سے کام کریں گے اور عوام کے جان و مال کا تحفظ اولین ترجیح ہے۔ اس موقع پر ڈسٹرکٹ ایمرجنسی آفیسر ریسکیو 1122 ڈاکٹر احمد کمال، سول ڈیفنس آفیسر عمران مہدی اور دیگر افسران نے تیاریوں، آلات اور دستیاب وسائل کے حوالے سے تفصیلی بریفنگ دی۔
