ڈیرہ غازی خان ،باغی ٹی وی(سٹی رپورٹرجواداکبر) حکومت پنجاب قانون گوئی سطح پر اراضی ریکارڈ سینٹر بنانے پر غور کر رہی ہے، جہاں نائب تحصیلدار اور پٹواری موجود ہوں گے۔ اسٹیٹ آف دی آرٹ ریکارڈ روم کے قیام کی تجویز بھی زیر غور ہے۔
یہ بات سینئر ممبر بورڈ آف ریونیو (ایس ایم بی آر) نبیل جاوید نے کوٹ ادو میں ریونیو اجلاس کی صدارت کرتے ہوئے کہی۔ اجلاس میں کمشنر ڈیرہ غازی خان ڈویژن اشفاق احمد چوہدری، ڈپٹی کمشنر منور عباس بخاری اور دیگر افسران شریک تھے۔
ایس ایم بی آر نبیل جاوید نے ہدایت کی کہ ڈپٹی کمشنرز ریونیو کیسز کے جلد حل کیلئے باقاعدہ عدالتیں لگائیں۔ عوام کیلئے فردِ ملکیت اور وراثت کے حصول کا عمل مزید آسان بنایا جائے۔ 15 فروری تک تمام مواضعات کو آن لائن کیا جائے۔ سرکاری اراضی کی نیلامی کے عمل کو تیز کیا جائے۔
انسداد تجاوزات مہم میں تیزی لا کر ہر انچ سرکاری زمین واگزار کرائی جائے۔
انہوں نے تقسیم کے انتقالات پر فیس کے خاتمے کو احسن اقدام قرار دیتے ہوئے کہا کہ ریونیو عملہ مشترکہ کھاتوں کی بروقت تقسیم یقینی بنائے۔
کمشنر ڈی جی خان اشفاق احمد چوہدری نے بتایا کہ اسسٹنٹ کمشنرز اور ریونیو افسران کو سرکاری واجبات کی 100 فیصد وصولی کی ہدایت کی گئی ہے۔
ڈپٹی کمشنر کوٹ ادو منور عباس بخاری کا کہنا تھا کہ تحصیلوں میں ریکوری آپریشن تیز کر دیا گیا ہے اور ریونیو کورٹس کے ذریعے واجبات کے کیسز جلد نمٹائے جائیں گے۔
