ڈیرہ غازی خان(نیوزرپورٹرشاہدخان) ڈپٹی کمشنر کا ہسپتال کا معائنہ، مفت ادویات کی فراہمی کا حکم
ڈیرہ غازی خان کے ڈپٹی کمشنر محمد عثمان خالد نے علامہ اقبال ٹیچنگ ہسپتال کا اچانک دورہ کیا۔ اس دورے میں ان کے ہمراہ اسسٹنٹ کمشنر صدر تیمور عثمان اور دیگر افسران بھی موجود تھے۔ ڈپٹی کمشنر نے ہسپتال کے مختلف شعبوں کا تفصیلی معائنہ کیا، جن میں ٹراما سینٹر اور ایمرجنسی وارڈ بھی شامل تھے۔ انہوں نے مریضوں کی عیادت کی اور ان کے لواحقین، ڈاکٹروں اور پیرا میڈیکل سٹاف سے ہسپتال کی سہولیات کے بارے میں معلومات حاصل کیں۔
اس دورے کے دوران ڈپٹی کمشنر نے ہسپتال میں باہر کی ادویات تجویز کرنے پر برہمی کا اظہار کیا اور اس کی وضاحت طلب کی۔ انہوں نے ہسپتال انتظامیہ کو ہدایت کی کہ داخل مریضوں کو تمام ادویات مفت فراہم کی جائیں اور باہر کی ادویات تجویز کرنے والوں کے خلاف قانونی کارروائی کی جائے۔ ڈپٹی کمشنر محمد عثمان خالد نے کہا کہ وزیر اعلیٰ پنجاب مریم نواز شریف کی ہدایات کے مطابق ہسپتالوں میں بہتر طبی سہولیات کی فراہمی کے لیے سخت نگرانی جاری رکھی جائے گی۔ انہوں نے ڈاکٹروں اور پیرا میڈیکل سٹاف کو بروقت حاضری یقینی بنانے اور صفائی، سکیورٹی، پارکنگ اور کینٹین سمیت ہسپتال کے تمام شعبوں میں ایس او پیز پر عمل درآمد کرنے کی ہدایت کی۔
ڈپٹی کمشنر نے مریضوں اور ان کے لواحقین سے بھی کہا کہ اگر انہیں مفت ادویات فراہم نہیں کی جاتیں تو وہ ہیلپ لائن 103 پر کال کر کے شکایت درج کروا سکتے ہیں، جس پر فوری کارروائی کی جائے گی۔ انہوں نے ہسپتال انتظامیہ سے کہا کہ وہ ٹیم ورک کے ذریعے سرکاری ہسپتالوں کے معاملات کو بہتر بنائیں۔
