ڈیرہ غازی خان: وڈور روڈ پر فائرنگ کا تبادلہ، ایک ملزم زخمی میں گرفتار

ڈیرہ غازی خان (باغی ٹی وی ،نیوزرپورٹر شاہد خان)وڈور روڈ پر واقع باڑہ چوک کے قریب پولیس اور ملزمان کے درمیان فائرنگ کا ایک شدید مقابلہ ہوا جس کے نتیجے میں ایک ملزم کو زخمی حالت میں گرفتار کر لیا گیا۔

تھانہ صدر پولیس کی ایک گشتی ٹیم جب وڈور روڈ پر گشت کر رہی تھی تو تین مشکوک افراد کو اسلحہ لیے دیکھا۔ پولیس کو دیکھ کر ملزمان فرار ہونے لگے اور پولیس پر اندھا دھند فائرنگ شروع کر دی۔ پولیس نے بھی اپنی جان کی حفاظت کے لیے جوابی فائرنگ کی اور ملزمان کا ڈٹ کر مقابلہ کیا۔

کافی دیر تک جاری رہنے والے اس مقابلے کے بعد پولیس نے ایک ملزم کو زخمی حالت میں گرفتار کر لیا۔ گرفتار ملزم کی شناخت محمد یاسر ولد محمد سلیم کے نام سے ہوئی ہے اور وہ موٹر سائیکل چوری کرنے جیسے کئی جرائم میں ملوث رہ چکا ہے۔

زخمی ملزم کو طبی امداد کے لیے ہسپتال منتقل کر دیا گیا ہے جبکہ فرار ہونے والے دیگر ملزمان کو پکڑنے کے لیے وسیع پیمانے پر سرچ آپریشن جاری ہے۔