ڈیرہ غازی خان (سٹی رپورٹر جواد اکبر) دانش اتھارٹی کے تحت چلنے والے گرلز سنٹر آف ایکسیلنس ڈیرہ غازی خان میں یوم آزادی کے حوالے سے ایک پروقار تقریب کا انعقاد کیا گیا۔ تقریب کی مہمان خصوصی ایڈیشنل ڈپٹی کمشنر جنرل قدسیہ ناز تھیں۔

تقریب کا آغاز پرچم کشائی سے ہوا، جس کے بعد طالبات نے ملی نغموں، تقریروں اور خوبصورت خاکوں کے ذریعے پاکستان سے اپنی محبت کا اظہار کیا۔ یومِ آزادی کی مناسبت سے کیک بھی کاٹا گیا۔

ادارے کی پرنسپل شبانہ آفرین نے اس موقع پر ادارے کی تعلیمی اور غیر نصابی سرگرمیوں پر روشنی ڈالی اور طالبات کی کارکردگی اور محنت کی تعریف کی۔

تقریب کے اختتام پر "گرین پنجاب” مہم کے تحت ادارہ میں شجرکاری بھی کی گئی۔ طالبات اور اساتذہ نے اس میں بھرپور حصہ لیا اور ملک کو سرسبز و شاداب بنانے کے عزم کا اعادہ کیا۔

مہمان خصوصی قدسیہ ناز نے تقریب کے کامیاب انعقاد کو سراہا اور طالبات کے جذبہ حب الوطنی کی تعریف کی۔ انہوں نے کہا کہ نئی نسل کا یہ جذبہ ہی پاکستان کے روشن مستقبل کی ضمانت ہے۔

Shares: