ڈیرہ غازیخان(باغی ٹی وی،نامہ نگارشہزادخان)عدالتی احکامات نظرانداز،میونسپل کارپوریشن کا قبضہ،پریس کلب ڈی سیل نہ ہوسکا
تفصیل کے مطابق ڈیرہ غازی خان میں پریس کلب پر میونسپل کارپوریشن کا ناجائز قبضہ برقرار ہے، عدالتی احکامات کے باوجود پریس کلب کو ڈی سیل کرنے میں مسلسل تاخیری حربے جاری ہیں۔ عدالت نے چھ ماہ سے بند پریس کلب کو کھولنے کا حکم جاری کیا، لیکن میونسپل کارپوریشن کی عدم تعاون کی روش کے باعث عمل درآمد ممکن نہیں ہو سکا۔
صدر پریس کلب شیر افگن بزدار کی درخواست پر سول جج جہانگیر سلطان شیخ نے میونسپل کارپوریشن کی جانب سے پریس کلب کو سیل کرنے کے حکم کو معطل کرتے ہوئے فوری ڈی سیل کرنے کا حکم دیا۔ عدالت میں مؤقف اختیار کیا گیا کہ پریس کلب کا رقبہ 60 سال قبل صوبائی حکومت نے باقاعدہ الاٹ کیا تھا اور میونسپل کارپوریشن کو اسے سیل کرنے کا قانونی اختیار نہیں۔
عدالت کے واضح فیصلے کے باوجود میونسپل کارپوریشن نے احکامات کو نظرانداز کر رکھا ہے اور پریس کلب پر اپنے عملے کو تعینات کر دیا ہے۔ اس رویے کے باعث صحافی برادری شدید مشکلات اور مایوسی کا شکار ہے۔
گذشتہ روز صدر پریس کلب شیرافگن بزدار نے اپنی الیکٹڈ باڈی کے ہمراہ عدالتی احکامات کارپوریشن کے عملے کو پیش کیے، لیکن انتظامیہ نے کوئی پیش رفت نہیں کی۔ صحافی برادری نے عدالت سے اپیل کی ہے کہ احکامات پر فوری عمل درآمد کے لیے عدالتی بیلف کے ذریعے کارروائی کی جائے اور اعلیٰ حکام اس معاملے میں فوری مداخلت کریں۔
