ڈیرہ غازی خان(باغی ٹی وی ،سٹی رپورٹرجواداکبر) پاکستان مرکزی مسلم لیگ ڈیرہ غازی خان نے شہر میں ایک بڑی ختم نبوت کانفرنس کا انعقاد کیا۔ اس کانفرنس میں ہزاروں کی تعداد میں کارکنان، اساتذہ، وکلاء، علماء اور طلبہ نے شرکت کی۔ کانفرنس کا مقصد ختم نبوت کے عقیدے کو اجاگر کرنا اور اس پر ہونے والے کسی بھی حملے کا مقابلہ کرنے کا عزم ظاہر کرنا تھا۔
مرکزی مسلم لیگ کے رہنماؤں نے خطاب کرتے ہوئے کہا کہ ختم نبوت کا مسئلہ ہمارے دین اور ایمان کا مسئلہ ہے۔ پارٹی اس مسئلے پر مکمل طور پر نظر رکھے ہوئے ہے اور کسی کو بھی اس پر چھیڑ چھاڑ کرنے کی اجازت نہیں دی جائے گی۔ انہوں نے مبارک ثانی کیس کا حوالہ دیتے ہوئے کہا کہ اس کیس میں عدلیہ نے عوامی جذبات اور شرعی پہلوؤں کو نظر انداز کیا ہے جس پر پارٹی نے شدید مذمت کی ہے۔
کانفرنس میں موجود تمام قائدین نے مشترکہ طور پر ایک اعلامیہ جاری کیا جس میں کہا گیا کہ پاکستان مرکزی مسلم لیگ سسٹم میں موجود قادیانی لابی کو خبردار کرتی ہے کہ آئندہ ایسی کوئی بھی حرکت ہرگز برداشت نہیں کی جائے گی۔ انہوں نے کہا کہ عقیدہ ختم نبوت مسلمانوں کی ریڈ لائن ہے اور اس قانون میں کسی قسم کی چھیڑ چھاڑ برداشت نہیں کی جائے گی۔
کانفرنس میں شرکت کرنے والے لوگوں نے اس بات پر زور دیا کہ پوری قوم ختم نبوت کے مسئلے پر متحد ہے اور اس پر ہونے والا کوئی بھی حملہ برداشت نہیں کیا جائے گا۔ انہوں نے نوجوان نسل سے اپیل کی کہ وہ عقیدہ ختم نبوت کو سمجھیں اور اس کا دفاع کریں۔
