ڈیرہ غازی خان(باغی ٹی وی نیوز رپورٹرشاہدخان) ریجنل پولیس آفیسر (آر پی او) ڈیرہ غازی خان کیپٹن (ر) سجاد حسن خان نے عوام کی شکایات اور پولیس سے متعلقہ مسائل کے فوری حل کے لیے روزانہ کی بنیاد پر کھلی کچہری کا انعقاد جاری رکھا ہوا ہے۔
کھلی کچہری میں ریجن کے تمام اضلاع سے شہریوں کی ایک بڑی تعداد نے شرکت کی اور اپنے مسائل براہ راست آر پی او کے سامنے پیش کیے۔ کیپٹن (ر) سجاد حسن خان نے مسائل سنے اور ان کے ازالے کے لیے موقع پر ہی احکامات جاری کیے۔ انہوں نے متعلقہ افسران کو ہدایت کی کہ وہ تمام درخواستوں کا باقاعدہ فالو اپ لیں اور مقررہ مدت میں رپورٹ پیش کریں۔
اس موقع پر آر پی او کا کہنا تھا کہ پولیس عوام کی خدمت کے لیے ہر وقت تیار ہے اور شہریوں کے مسائل کے حل کے لیے ہر ممکن اقدامات کیے جائیں گے۔ کھلی کچہری کا مقصد عوام کے مسائل کو فوری سننا اور ان کی داد رسی کو یقینی بنانا ہے۔ انہوں نے پولیس اہلکاروں کو خبردار کیا کہ عوامی شکایات کو ترجیحی بنیادوں پر حل کیا جائے، اور اس سلسلے میں کسی بھی قسم کی کوتاہی یا غفلت برداشت نہیں کی جائے گی۔
