fbpx

بالی ووڈ میں کورونا وائرس بحران: دلیپ کمار کے بھتیجے مفلسی کا شکار

بالی ووڈ کے لیجنڈ اداکار دلیپ کمار کے بھتیجے اور اداکار ایوب خان کا کہنا ہے کہ بالی ووڈ میں کورونا وائرس کی وجہ سے ایسے حالات پیدا ہوگئے ہیں کہ اب لگتا ہے انھیں لوگوں سے مدد مانگنا پڑے گی۔

باغی ٹی وی : گزشتہ سال سے کورونا وبا نے دنیا بھر کی معشیت کو شدید متاثر کیا ہےجہاں تمام کاروباری ،ثقافتی سرگرمیاں کورونا وبا سے متاثرہوئیں ہیں وہیں دنیا بھر کی شوبز انڈسٹری کو بھی متاثر کیا جن میں بالی ووڈ بھی شامل ہے یہاں تک کہ فنکار مختلف کام اور مزدوریاں کرنے پر مجبور ہو گئے-

تاہم اب اس حوالے سے لیجنڈ اداکار دلیپ کمار کے بھتیجے اور اداکار ایوب خان کا کہنا ہے کہ انھوں نے گزشتہ ڈیڑھ برس سے کچھ نہیں کمایا اور اب جمع پونجی بھی ختم ہونے کو ہے۔

بھارتی میڈیا کے مطابق اداکار نے کہا انھیں خدشہ ہے کہ اگر کورونا وائرس کا بحران جاری رہا اور حالات میں بہتری نہ آئی تو ان کے پاس اس کے علاوہ کوئی آپشن نہ ہوگا کہ وہ مدد کے لیے لوگوں کی جانب دیکھیں۔

اداکار نے کہا کہ ریاست مہاراشٹر میں کورونا وائرس کے پھیلاؤ میں تیزی کی وجہ سے نافذ کردہ پندرہ روزہ لاک ڈاؤن کی وجہ سے شوٹنگ بند ہے، اور کام متاثر ہورہا ہے اور ہر کوئی زندگی گزارنے کے لیے ہاتھ پاؤں مارہا ہے۔

52 سالہ ایوب خان نے کہا کہ میں ڈیڑھ برس سے مسلسل بیکار بیٹھا ہوں اگر یہی صورتحال برقرار رہی تو پھر لوگوں کے آگے ہاتھ پھیلانے کے علاوہ کوئی راستہ نہیں رہ جائے گا۔

واضح رہے کہ ایوب خان اداکار دلیپ کمار کے چھوٹے بھائی اداکار ناصر خان اور 1940 اور 1950 کے عشرے کی معروف اداکارہ بیگم پارہ کے بیٹے ہیں-

جواب چھوڑیں

آپ کا ای میل ایڈریس شائع نہیں کیا جائے گا.