امریکی سفیر ڈونلڈ بلوم کا کراچی میں پاک امریکا باہمی تجارت کو فروغ دینے کا عزم

کراچی: امریکی سفیر ڈونلڈ بلوم نے حالیہ دورے کے دوران پاکستان اور امریکا کے درمیان باہمی تجارت کو مزید فروغ دینے کے عزم کا اعادہ کیا ہے۔ یہ بات امریکی قونصلیٹ کراچی کے شعبہ پبلک ڈپلومیسی کی جانب سے جاری کردہ پریس ریلیز میں کہی گئی ہے۔ پریس ریلیز کے مطابق، امریکا اور پاکستان کے درمیان سات دہائیوں پر محیط طویل المدتی شراکت داری قائم ہے، جس کا دائرہ صحت، تعلیم، توانائی، معاشی ترقی اور سیکیورٹی جیسے شعبوں تک پھیلا ہوا ہے۔ امریکی حکومت کی جانب سے گزشتہ سالوں میں پاکستان میں سرمایہ کاری میں 50 فیصد سے زائد اضافہ ہوا ہے، جو دونوں ممالک کے درمیان مضبوط اور مربوط معاشی تعلقات کی عکاسی کرتا ہے۔امریکا اور پاکستان کے درمیان سرمایہ کاری کے شعبے میں ماحول دوست توانائی، پائیدار زراعت، اور صحت عامہ میں تپ دق کے کنٹرول کے منصوبے شامل ہیں۔ اس کے علاوہ، امریکا پاکستان گرین الائنس اور عوامی روابط کے ذریعے پاکستان کے ثقافتی ورثے کے تحفظ کے لیے بھی اہم اقدامات کر رہا ہے۔
امریکی سفیر ڈونلڈ بلوم نے کراچی میں 22 سے 25 اکتوبر تک فریئر ہال کی تاریخی ثقافتی ورثے کی بحالی کے لیے 3 لاکھ 50 ہزار ڈالر کے امریکی سفیر کے فنڈ برائے ثقافتی تحفظ (AFCP) منصوبے کی اختتامی تقریب میں شرکت کی۔ اس تقریب کے دوران انہوں نے کہا، "یہ نادر منصوبہ امریکی قونصلیٹ اور سندھ ایکسپلوریشن اینڈ ایڈونچر سوسائٹی کی شراکت داری سے پایہ تکمیل کو پہنچا ہے، جو واضح طور پر ان تمام کاوشوں کی نمائندگی کرتا ہے جو امریکا اور پاکستان مل کر کرتے آئے ہیں۔انہوں نے مزید کہا کہ فریئر ہال 2002 کے دھماکے میں متاثر ہوا تھا اور اس کی بحالی دونوں ممالک کے تعلقات اور ثقافتی ورثے کے تحفظ کا عزم ظاہر کرتی ہے۔
امریکی سفیر بلوم نے تپ دق کے خلاف پاکستان کی کوششوں کو مزید تقویت دینے کے لیے سندھ حکومت کو 5 جدید تشخیصی موبائل گاڑیاں اور 3 موبائل ایکسرے مشینیں فراہم کیں۔ یہ آلات یوایس ایڈ پروگرام کے تحت فراہم کیے گئے تاکہ دور دراز علاقوں میں تپ دق کی تشخیص و علاج میں بہتری لائی جا سکے۔اس دوران، امریکی سفیر نے ایک مقامی فوڈ پراسیسنگ کمپنی نیوٹریلو کا دورہ بھی کیا، جسے یو۔ایس۔ایڈ کے انویسٹمنٹ پروموشن ایکٹیویٹی (آئی۔پی۔اے) پروگرام کے تحت تعاون حاصل ہے۔ اس پروگرام کا مقصد امریکی معاونت سے پاکستان میں کاروباری مواقع اور روزگار کی مد میں نئے رجحانات کو فروغ دینا ہے۔کراچی میں قیام کے دوران، سفیر بلوم نے انسانی حقوق کے ماہرین سے ملاقات کی اور مذہبی آزادی و محنت کشوں کے حقوق جیسے اہم مسائل پر تبادلہ خیال کیا۔ اسی دوران، امریکی بزنس کونسل کے ایگزیکٹو کمیٹی کے ساتھ ایک عشائیے میں شرکت کرتے ہوئے انہوں نے امریکا اور پاکستان کے درمیان تجارت کو مزید فروغ دینے کے عزم کا اعادہ کیا۔