حافظ آباد،باغی ٹی وی(خبر نگارشمائلہ) ڈسٹرکٹ پولیس آفیسر حافظ آباد، عاطف نذیر نے ایس پی انویسٹی گیشن محمد عمران اور ڈی ایس پی سرکل پنڈی بھٹیاں عارف خان کے ہمراہ تھانہ صدر پنڈی بھٹیاں کی زیر تعمیر عمارت کا دورہ کیا۔
ڈی پی او نے تعمیراتی کام کا تفصیلی جائزہ لیتے ہوئے متعلقہ ٹھیکیداروں اور افسران کو ہدایت کی کہ کام کے معیار اور رفتار پر کوئی سمجھوتہ نہ کیا جائے۔ انہوں نے کہا کہ جدید اور باوقار تھانے عوام کو بہتر سہولیات اور معیاری پولیس سروس کی فراہمی میں کلیدی کردار ادا کرتے ہیں۔
ڈی پی او عاطف نذیر نے منصوبے کو علاقے کی عوام کے لیے ایک مثبت قدم قرار دیتے ہوئے کہا کہ تھانہ کلچر میں بہتری اور سائلین کو خوشگوار اور باعزت ماحول کی فراہمی محکمہ پولیس کی اولین ترجیحات میں شامل ہے۔
ترجمان پولیس حافظ آباد کے مطابق ڈی پی او کا یہ دورہ پولیس اصلاحات اور بہتر سہولیات کی فراہمی کی جانب ایک عملی پیش رفت ہے۔
