ایک 46 سالہ ڈاکٹر، گیرہارڈ کونگ، کو پیر کے روز اپنی 36 سالہ بیوی، ایریئل کونگ، جو ایک نیوکلیئر انجینئر ہیں، کو قتل کرنے کی کوشش کے الزام میں گرفتار کر لیا گیا۔
پولیس کے مطابق، گیرہارڈ کونگ نے اپنی بیوی پر مکوں،تھپڑوں اور ایک پتھر سے حملہ کیا اور پھر اسے ہائیکنگ ٹریل سے نیچے دھکیلنے کی کوشش کی، جس کے نتیجے میں وہ شدید زخمی ہو گئیں۔ اطلاعات کے مطابق، اس حملے کے دوران گیرہارڈ نے دو سرنجز نکالیں اور انہیں اپنی بیوی کے خلاف استعمال کرنے کی کوشش کی۔رپورٹس کے مطابق، یہ واقعہ اس وقت پیش آیا جب ایریئل کونگ نے اپنے شوہر کے ساتھ تصویر کھنچوانے سے انکار کیا۔ ہوائی نیوز کے مطابق، انہیں تشویشناک حالت میں اسپتال لے جایا گیا، جہاں ان کے چہرے اور سر پر شدید چوٹیں پائی گئیں۔ دوسری جانب، گیرہارڈ کونگ کو پیر کی شام تقریباً 6:45 بجے پالی ہائی وے کے قریب ایک مختصر تعاقب کے بعد گرفتار کر لیا گیا،
گرفتاری کے بعد، معلوم ہوا کہ گیرہارڈ کونگ اینستھیزیا میڈیکل گروپ کے ساتھ بطور ڈاکٹر وابستہ تھا اور ماؤئی میں مختلف طبی مراکز، بشمول ماؤئی میموریل میڈیکل سینٹر، میں طبی خدمات فراہم کر رہا تھا۔ تاہم، تحقیقات کے دوران انہیں طبی عملے سے معطل کر دیا گیا ہے۔
ماؤئی ہیلتھ نے ایک بیان جاری کرتے ہوئے کہا:”ماؤئی ہیلتھ مریضوں کی سلامتی اور اعلیٰ معیار کی دیکھ بھال کو یقینی بنانے کے لیے پرعزم ہے۔ ہمیں گیرہارڈ کونگ، ایم ڈی، کے خلاف الزامات کے بارے میں مطلع کیا گیا ہے۔ ڈاکٹر کونگ کو تحقیقات مکمل ہونے تک طبی عملے سے معطل کر دیا گیا ہے۔
گیریہارڈ اور ایریئل کونگ ماؤئی میں ایک 1.5 ملین ڈالر مالیت کے گھر میں رہائش پذیر ہیں، لیکن واقعے کے وقت وہ اوآہو کے دورے پر تھے۔ یہ جوڑا 2018 سے شادی شدہ ہے۔ اطلاعات کے مطابق، گیرہارڈ کونگ کی یہ دوسری شادی ہے اور ان کے پچھلے تعلق سے کم از کم ایک بچہ بھی ہے۔پولیس مزید تحقیقات کر رہی ہے، اور گیرہارڈ کونگ پر عائد الزامات کے حوالے سے قانونی کارروائی جاری ہے۔
