ڈیرہ غازی خان(باغی ٹی وی،نیوز رپورٹرشاہدخان) خدمتِ خلق کی نئی مثال، ڈاکٹر رضوان الحسین صدیقی کی منشیات کے خلاف خاموش جنگ
تفصیلات کے مطابق ڈاکٹر رضوان الحسین صدیقی، جو میڈیکل کالج ڈیرہ غازی خان میں اسسٹنٹ پروفیسر ہیں اور زین کلینک بلخ سرور میں ماہرِ امراضِ نفسیات اور ترکِ منشیات کے طور پر خدمات انجام دے رہے ہیں، ایک ایسی شخصیت ہیں جو اپنی پیشہ ورانہ مہارت کے ساتھ ساتھ انسانی ہمدردی اور خلوص کی مثال ہیں۔
ڈاکٹر رضوان کا شمار ان چند معالجین میں ہوتا ہے جو مریضوں کو صرف دوا نہیں دیتے بلکہ انہیں اعتماد اور اپنائیت کا احساس بھی فراہم کرتے ہیں۔ ان کا سب سے نمایاں کارنامہ منشیات کے خلاف ان کی جدوجہد ہے۔ انہوں نے سیکڑوں نوجوانوں کو نشے کی تاریک دنیا سے نکال کر ایک نئی زندگی دی ہے۔ ان کے زیرِ علاج مریض نہ صرف جسمانی طور پر صحت یاب ہوتے ہیں بلکہ وہ انہیں ذہنی اور روحانی طور پر بھی مضبوط بناتے ہیں۔
ڈاکٹر رضوان الحسین صدیقی نفسیاتی بیماریوں کو سماجی بدنامی کا باعث نہیں بلکہ ایک قابلِ علاج مرض سمجھتے ہیں۔ وہ معاشرے میں ذہنی صحت کے بارے میں شعور اجاگر کرنے کے لیے مسلسل کوشاں ہیں۔ ان کی عاجزی، علم، اور ذمہ داری کا احساس انہیں ایک ایسا باوقار معالج بناتا ہے جو قوم کے لیے ایک قیمتی اثاثہ ہیں۔ ان جیسی شخصیات ملک و قوم کے لیے فخر کا باعث ہوتی ہیں جو خاموشی سے انسانیت کی خدمت میں مصروف ہیں۔
