ڈیرہ غازی خان ڈویژن میں بارش کے پانی کی نکاسی،بس اڈوں اور مساجد کی خصوصی صفائی کے احکامات جاری

ڈیرہ غازی خان،باغی ٹی وی ( شہزادخان سے )ڈیرہ غازی خان ڈویژن میں بارش کے کھڑے پانی کی نکاسی،بس اڈوں اور مساجد کی خصوصی صفائی کے احکامات جاری کردئیے گئے ہیں۔ یہ ہدایات کمشنر ڈاکٹر ناصر محمود بشیر نے ویڈیو لنک اجلاس کی صدارت کرتے ہوئے جاری کیں۔اجلاس میں چاروں اضلاع کے ڈپٹی کمشنرز جمیل احمد جمیل ،آغاظہیر عباس شیرازی ،خالد محمود،ڈاکٹر منصور بلوچ اور دیگر متعلقہ افسران شریک تھے۔کمشنر نےاجلاس میں پرائس کنٹرول،گندم خریداری مہم ،رمضان پیکج کے تحت مستحق خاندانوں میں آٹا کی تقسیم اور چیف سیکرٹری پنجاب کے دیگر انی شیٹیوز پر عملدرآمد کا جائزہ لیا۔کمشنر نے کہا کہ ڈی جی خان ڈویژن میں سرکاری عمارتوں کو ازسر رنگ و روغن کیا جائے۔ مراکز صحت اور مساجد میں صفائی مہم چلائی جائے۔بارش کے کھڑے پانی کی نکاسی کےلئے ہر ممکن اقدامات کئے جائیں ۔کمشنر ڈی جی خان نے کہا کہ بس اڈوں اور گرین بیلٹس کی بہتری کےلئے اقدامات کئے جائیں۔بجلی کے لٹکتے تار ٹھیک کرائے جائیں۔ہر مین ہول پر ڈھکن لگائےجائیں۔خستہ پل مرمت اور بل بورڈ مضبوط کئے جائیں۔کمشنر ڈاکٹر ناصر محمود بشیر نے کہا کہ پینے کے پانی کی کلورینیشن کرائی جائے۔ ڈی جی خان ڈویژن میں وال چاکنگ اور تجاوزات کا خاتمہ کرایا جائے۔کھیل کے گراؤنڈز بہتر کرکے آباد کرائے جائیں۔سٹریٹ اور روڈ لائٹس فنکشنل کرائی جائیں۔اجلاس میں خانہ و مردم شماری کا بھی جائزہ لیتے ہوئے ہدایات جاری کی گئیں ۔