سیالکوٹ: پولیس کی جانب سے عیدالاضحیٰ کا سیکیورٹی پلان جاری

سیالکوٹ،باغی ٹی وی( سٹی رپورٹر شاہد ریاض )سیالکوٹ پولیس کی جانب سے عیدالاضحی 2023 کا سیکیورٹی پلان جاری
ڈسٹرکٹ سیالکوٹ میں نماز عید الاضحی کے سلسلہ میں 1807 مساجد اور 02 بڑے اجتماعات پر سیالکوٹ پولیس کی جانب سے سیکیورٹی انتظامات مکمل کر لیے گئے ہیں۔ امن و امان کی صورت حال کو کنٹرول کرنے کیلئے ضلع بھر میں سیکیورٹی ہائی الرٹ، ملک دشمن و جرائم پیشہ عناصر پر کڑی نگاہ رکھنے کے لئے سول پارچات میں ملبوس اہلکار تعینات کیے گئے ہیں۔
ضلع بھر میں امن وامان قائم رکھنے کے لئے، 08 ڈی ایس پیز، 31 انسپکٹر، 85 سب انسپکٹر، 165 اسٹنٹ سب انسپکٹر ،130 ہیڈ کانسٹیبل ، 795 کنسٹیبل اور 148 لیڈی سٹاف مساجد، پارکس اور پکٹ ڈیوٹی فرائض انجام دیں گے۔ اس کے علاوہ ایلیٹ فورس کی 05 ٹیمیں اور 27 پولیس موبائلز سیکیورٹی کو موثر بنانے کیلئے اجتماعات کے گردونواح میں گشت پر مامور ہوں گی۔
ڈسٹرکٹ پولیس آفیسر محمد حسن اقبال کی خصوصی ہدایات پر عوام کی جان و مال کی حفاظت اور مویشی چوری کی روک تھام کے لیے شہر بھر میں پکٹ پوائنٹ قائم کیے گئے ہیں۔
ڈی پی او سیالکوٹ محمد حسن اقبال نے اس موقع پر کہا ہے کہ عیدالاضحی کی خوشیوں کے موقع پر عوام الناس کو پر امن ماحول فراہم کر نے کے لئے تمام وسائل استعمال کئے جائیں گے۔
ضلع میں امن و امان کی صورتحال کو قائم رکھنے کے لیے ضلع پولیس، ایلیٹ فورس، لیڈیز پولیس شہر بھرکے بازاروں اور زیادہ رش والے مقامات مارکیٹوں، شاپنگ سنٹرز، کمرشل سنٹرز، کاروباری پوائنٹس، اہم شاہراہوں اور داخلی اور خارجی راستوں پر پولیس اہلکار الرٹ رہتے ہوئے اپنے فرائض سر انجام دیں گے۔ضلعی پولیس کی ڈیوٹی کے علاوہ ٹریفک کا نظام رواں دواں رکھنے کے لئے ٹریفک پولیس اہلکاروں کی بائی نیم ڈیوٹی لگائی گئی ہے جنہیں اپنے فرائض انتہائی ذمہ داری سے سرانجام دینے کی ہدایات دی گئی ہیں۔
ڈی پی او سیالکوٹ نے کہا کہ جن مقامات پر نماز عید الاضحی منعقد ہونی ہے وہاں پارکنگ کا نظام 500 گز کے فاصلے پر بنایا جائے، جبکہ منتظمین مساجد نماز عید کیلئے مسجدوں کے داخلی راستے پر چیکنگ و شناخت کے لئے مقامی افراد کو بھی مامور کریں۔
ڈی پی او سیالکوٹ کا مزید کہنا تھا کہ وہی تنظیمیں اور خیراتی ادارے قربانی کی کھالیں اکھٹی کر سکتی ہیں جن کے پاس ڈی سی آفس کا جاری کردہ سرٹیفکیٹ ہوگا ان کے علاوہ کھالیں اکٹھی کرنے والوں کے خلاف سخت قانونی کاروائی عمل میں لائی جائے گی۔
ان کا مزید کہنا تھا کہ عید کے موقع پر ون ویلنگ، غیر نمونہ نمبر پلیٹ، بلا نمبری گاڑیوں، ہوائی فائرنگ، ہلڑ بازی کسی بھی صورت برداشت نہیں کی جائے گی۔ لاؤڈ اسپیکر کی خلاف ورزی پر قانونی کاروائی عمل میں لائی جائے گی۔
ڈی پی او سیالکوٹ نے عوام الناس کیلئے پیغام دیا کہ اس طرح کے تہواروں پر شر پسند عناصر متحرک ہونے کی کوشش کرتے ہیں اس لیے اپنے اردگرد کے ماحول پر کڑی نگاہ رکھتے ہوئے مشکوک اور شر پسند افراد کے بارے میں فوری اطلاع پکار ریسکیو 15 یا مقامی پولیس اسٹیشن پر دیں۔