ڈاکٹرغلام مصطفی بڈانی
جتوئی (باغی ٹی وی) مظفرگڑھ کی تحصیل جتوئی کے نواحی علاقے بستی عارف میں ایک وحشیانہ واقعے نے انسانیت کو شرمسار کر دیا ہے۔ آٹھ ماہ کی حاملہ خاتون کو اس کے اپنے شوہر،بیٹے اور سسرالیوں نے بے دردی سے تشدد کا نشانہ بنایا۔ کلہاڑی، لوہے کے راڈ اور ڈنڈوں کے پے در پے وار سے خاتون کی دونوں ٹانگیں اور بازو بری طرح ٹوٹ گئے، جس کے بعد سفاک ملزمان نے اسے تشویشناک حالت میں گھر سے باہر گلی میں پھینک دیا۔
اہل علاقہ کی بروقت اطلاع پر ریسکیو ٹیم نے فوری طور پر موقع پر پہنچ کر خاتون کو تحصیل ہیڈ کوارٹر (ٹی ایچ کیو) ہسپتال منتقل کیا۔ جہاں وہ زندگی اور موت کی کشمکش میں مبتلا ہے۔
متاثرہ خاتون نے پولیس کو اپنے بیان میں بتایا کہ اسے کردار پر شک کی بنیاد پر اس وحشیانہ تشدد کا نشانہ بنایا گیا۔
خاتون کے اہل خانہ کی جانب سے قانونی کارروائی سے انکار کے بعدپولیس کی مدعیت میں خاتون کے شوہر ،سسر ،دیور اور بیٹے سمیت 5 افراد کےخلاف تھانہ جتوئی میں مقدمہ درج کیا گیا ہے۔ پولیس کا کہنا ہے کہ ملزمان کی گرفتاری کے لیے چھاپے مارے جا رہے ہیں اور انہیں جلد انصاف کے کٹہرے میں لایا جائے گا۔
اس اندوہناک واقعے نے علاقے میں غم و غصے کی لہر دوڑا دی ہے اور خواتین کے خلاف تشدد کے بڑھتے ہوئے واقعات پر تشویش کا اظہار کیا جا رہا ہے۔
