لاہور (باغی ٹی وی رپورٹ) وزیراعلیٰ پنجاب مریم نواز شریف کی ہدایت پر سیلاب متاثرہ علاقوں میں امدادی سرگرمیاں مزید تیز کر دی گئی ہیں۔ جنوبی پنجاب کے چھ شہروں ملتان، مظفرگڑھ، رحیم یار خان، بہاولپور اور لودھراں میں ریسکیو آپریشن کے لیے مزید سامان اور افرادی قوت روانہ کر دی گئی ہے۔
ترجمان پنجاب حکومت کے مطابق ملتان میں متاثرین کی امداد کے لیے 108 کشتیاں، 109 ربڑ بوٹس اور 1130 لائف جیکٹس پہنچا دی گئیں۔ مظفرگڑھ میں 57 کشتیاں، 53 ربڑ بوٹس اور 683 لائف جیکٹس، رحیم یار خان میں 47 کشتیاں، 44 ربڑ بوٹس اور 519 لائف جیکٹس جبکہ بہاولپور میں 38 کشتیاں، 40 ربڑ بوٹس اور 519 لائف جیکٹس فراہم کی گئی ہیں۔ اسی طرح لودھراں میں 19 کشتیاں، 18 ربڑ بوٹس اور 546 لائف جیکٹس متاثرہ عوام کے لیے بھیجی گئی ہیں۔ مجموعی طور پر 119 سے زائد بوٹ آپریٹرز بھی تعینات کیے گئے ہیں۔
ادھر جلالپور پیر والا کی نواحی بستی بہاراں کے حفاظتی بلوچ واہ فلڈ بند میں اچانک شگاف پڑنے کے بعد ہنگامی انخلا شروع کر دیا گیا۔ وزیراعلیٰ پنجاب کی ہدایت پر کمشنر ملتان اور ڈپٹی کمشنر موقع پر پہنچ گئے جبکہ پاک فوج، انتظامیہ اور اریگیشن ٹیمیں شگاف پُر کرنے اور امدادی سرگرمیوں کے لیے مصروف عمل ہیں۔
انتظامیہ اور ریسکیو ٹیموں نے ممکنہ طور پر متاثر ہونے والے پانچ دیہات میں اعلانات کے ذریعے انخلا کا عمل شروع کیا۔ اہلکار گھروں کے دروازوں پر دستک دے کر شہریوں کو نکال کر محفوظ مقامات پر منتقل کر رہے ہیں۔
