خیبر: ضلعی انتظامیہ خیبر نے ہفتے کے روز جاری میٹرک امتحانات کے دوران منظم نقل کا انکشاف کرتے ہوئے اس میں ملوث اساتذہ، طلباء اور امتحانی عملے کے خلاف فوری کارروائی کی ہے۔
ڈپٹی کمشنر خیبر کیپٹن (ر) بلال شاہد راؤ نے صحافیوں کو بتایا کہ ضلعی انتظامیہ کو خفیہ ذرائع سے اطلاع ملی تھی کہ گورنمنٹ ہائی اسکول ہاشم آباد میں اسکول کا عملہ لائبریری میں امتحانی پرچے حل کرکے ان کی فوٹو کاپیاں تیار کرتا ہے اور یہ حل شدہ پرچے امتحان دینے والے طلباء کو فراہم کیے جاتے ہیں۔اطلاع ملنے پر اسسٹنٹ کمشنر جمرود فہد ضیاء نے نجی گاڑی کے ذریعے امتحانی مرکز کا اچانک معائنہ کیا تاکہ کسی کو شک نہ ہو۔ دورانِ معائنہ، گریڈ 8 کے طلباء اور اساتذہ کو پرچہ حل کرتے ہوئے رنگے ہاتھوں پکڑا گیا، جبکہ حل شدہ پرچوں کی فوٹو کاپیاں تیار کرکے نجی اور سرکاری اسکولوں کے طلباء کو فراہم کی جا رہی تھیں۔
اسسٹنٹ کمشنر نے موقع سے فوٹو کاپی مشین اور حل شدہ پرچوں کی کاپیاں تحویل میں لے لیں اور ملوث اساتذہ و طلباء کو تحصیل جمرود منتقل کر دیا۔ڈپٹی کمشنر خیبر نے کہا کہ گرفتار اساتذہ اور طلباء کے بیانات قلمبند کر لیے گئے ہیں اور واقعے کی مفصل رپورٹ مرتب کی جا رہی ہے جو چیئرمین پشاور تعلیمی بورڈ، محکمہ تعلیم اور پرائیویٹ اسکول ریگولیٹری اتھارٹی (PSRA) کو مزید کارروائی کے لیے بھیجی جائے گی۔کیپٹن (ر) بلال شاہد راؤ نے مزید کہا کہ امتحانی ہالز میں نقل کے مکمل خاتمے کے لیے سخت نگرانی کی جا رہی ہے اور اسسٹنٹ کمشنرز کو تحصیل سطح پر مانیٹرنگ کی ذمہ داری سونپی گئی ہے۔
انہوں نے بتایا کہ ضلع بھر میں نقل کی روک تھام کے لیے دفعہ 144 نافذ کی گئی ہے، جس کے تحت امتحانی مراکز کے اردگرد عوامی اجتماعات، پاکٹ گائیڈز کی خرید و فروخت، موبائل فونز، فوٹو کاپی مشینوں اور دیگر ڈیجیٹل ڈیوائسز کے استعمال پر مکمل پابندی عائد کر دی گئی ہے۔
