ممتاز حیدر
بھارتی اینکر اور متنازع صحافی ارنب گوسوامی اور بھارتیہ جنتا پارٹی (بی جے پی) کے آئی ٹی سیل کے سربراہ امیت مالویہ کے خلاف جھوٹی خبریں پھیلانے کے الزام میں مقدمہ درج کرلیا گیا ہے۔ یہ مقدمہ انڈین یوتھ کانگریس کی جانب سے دائر کیا گیا ہے۔
بھارتی میڈیا رپورٹس کے مطابق دہلی پولیس کو موصول ہونے والی شکایت میں الزام لگایا گیا ہے کہ ارنب گوسوامی اور امیت مالویہ نے ایک مجرمانہ سازش کے تحت سوشل میڈیا اور دیگر پلیٹ فارمز کے ذریعے عوام میں جھوٹ پر مبنی معلومات پھیلائیں۔ پولیس کا کہنا ہے کہ یہ مقدمہ تعزیرات ہند کی مختلف دفعات کے تحت درج کیا گیا ہے، جن میں جھوٹے بیانات دینا، عوامی امن میں خلل ڈالنا اور بدنیتی پر مبنی معلومات کو دانستہ طور پر پھیلانا شامل ہیں۔انڈین یوتھ کانگریس کے نمائندے نے الزام لگایا ہے کہ امیت مالویہ اور ارنب گوسوامی نے ایک منظم اور سوچے سمجھے منصوبے کے تحت جھوٹی معلومات کو فروغ دیا تاکہ سیاسی مخالفین کو بدنام کیا جا سکے اور عوامی رائے کو گمراہ کیا جائے۔ شکایت میں کہا گیا ہے کہ اس اقدام کا مقصد نہ صرف سچائی کو مسخ کرنا تھا بلکہ سوشل میڈیا پر نفرت انگیزی کو فروغ دینا بھی تھا۔
ارنب گوسوامی پر اس سے قبل بھی متعدد مواقع پر جانبدارانہ رپورٹنگ اور جھوٹی خبریں نشر کرنے کے الزامات لگتے رہے ہیں، تاہم یہ پہلا موقع ہے کہ ان کے خلاف باقاعدہ مقدمہ درج ہوا ہے۔ امیت مالویہ، جو بی جے پی کے آئی ٹی ونگ کے سربراہ ہیں، کو بھی ماضی میں سوشل میڈیا پر گمراہ کن مواد پھیلانے پر تنقید کا نشانہ بنایا جا چکا ہے۔
