نان ڈیوٹی پیڈ سگریٹ فیکٹری پر کارروائی، اربوں روپے کی ٹیکس چوری پکڑی
فیڈرل بورڈ آف ریونیو (ایف بی آر) نے خفیہ اداروں کی رپورٹ پر بہاولنگر میں ایک نان ڈیوٹی پیڈ سگریٹ بنانے والی فیکٹری پر چھاپہ مارا اور سگریٹ سیکٹر میں ملکی تاریخ کی سب سے بڑی ٹیکس چوری کا پتہ چلایا ہے۔ اس کارروائی کے دوران ایف بی آر نے دو ارب 56 کروڑ روپے کی فیڈرل ایکسائز ڈیوٹی چوری کو بے نقاب کرتے ہوئے 10 ارب روپے سے زائد مالیت کے نان ڈیوٹی پیڈ سگریٹ ضبط کرلیے۔یہ کارروائی ایف بی آر کے چیئرمین راشد محمود لنگڑیال کی ہدایت پر کی گئی، جس کی قیادت چیف کمشنر آر ٹی او بہاولپور صاحبزادہ عبدالمتین اور دیگر اعلیٰ افسران نے کی۔ اس ٹیم میں کمشنر آر ٹی او ممتاز احمد، ڈپٹی کمشنر عمران یوسف، اور آڈٹ افسر محمد کامران شامل تھے۔
ذرائع کے مطابق، چھاپے کے دوران پکڑے گئے نان ڈیوٹی پیڈ سگریٹ اور سگریٹ سازی کے سامان پر ٹیکس چوری کی جانے والی رقم 2 ارب 56 کروڑ روپے تھی۔ ایف بی آر کے اہلکاروں نے بڑی محنت سے یہ چوری پکڑتے ہوئے قومی خزانے کو اربوں روپے کے نقصان سے بچایا۔مذکورہ فیکٹری خیبر پختونخوا کی ایک بڑی بااثر شخصیت کی ملکیت بتائی جاتی ہے، لیکن ایف بی آر نے کسی قسم کے اثر و رسوخ یا دباؤ کو خاطر میں لائے بغیر کارروائی کی اور اس کا بھرپور انداز میں مقابلہ کیا۔ اس کارروائی سے ثابت ہوگیا کہ ایف بی آر نے بغیر کسی تعصب یا دباؤ کے ملکی خزانے کا تحفظ کیا ہے۔
یہ چھاپہ ایف بی آر کی جانب سے ٹیکس چوری کے خلاف جاری کریک ڈاؤن کا حصہ ہے، جو ملکی معیشت کی بہتری اور غیر قانونی سرگرمیوں کی روک تھام کے لیے انتہائی اہمیت کا حامل ہے۔
