لاہور: فیڈرل بورڈ آف ریونیو (ایف بی آر) لاہور نے ایک اہم فیصلہ کیا ہے کہ وہ ایسے صنعت کاروں اور تاجروں کے اثاثوں کی جامع چھان بین کرے گا جو اپنی آمدنی کے مطابق ٹیکس ادا نہیں کر رہے۔ یہ فیصلہ ٹیکس کے نظام میں شفافیت اور ٹیکس نیٹ کو وسیع کرنے کے لیے کیا گیا ہے تاکہ ٹیکس چوری کو روکا جا سکے۔
نجی ٹی وی کےذرائع کے مطابق لاہور میں کئی ایسے بڑے صنعت کار اور تاجر موجود ہیں جو اپنی شاندار اور پرتعیش رہائش گاہوں، بشمول عالی شان بنگلوں اور بڑی کوٹھیوں میں رہتے ہوئے بھی حکومت کو کم ٹیکس ادا کر رہے ہیں۔ ایف بی آر نے کہا ہے کہ ایسے افراد کی ٹیکس ادا کرنے کی صورتحال کا بغور جائزہ لیا جائے گا اور جہاں کہیں بھی تضاد پایا گیا، وہاں سخت کارروائی کی جائے گی۔ذرائع نے مزید بتایا کہ ایف بی آر لاہور پہلے مرحلے میں ان صنعت کاروں اور تاجروں کو نوٹس جاری کرے گا جو آمدنی کے مطابق مناسب ٹیکس نہیں دے رہے۔ اگر نوٹس کا جواب غیر تسلی بخش ہوا یا مکمل تعاون نہ ملا تو قانونی کارروائی شروع کی جائے گی۔
ایف بی آر کے ذرائع نے یہ بھی انکشاف کیا کہ تاجروں کے شاہانہ رہن سہن کا تفصیلی ڈیٹا پہلے ہی اکٹھا کر لیا گیا ہے، جس میں ان کی جائیدادیں، بنگلوں، گاڑیاں اور دیگر اثاثے شامل ہیں۔ اس ڈیٹا کی مدد سے ان افراد کی آمدنی اور ٹیکس ادائیگی کے درمیان فرق کو کھنگالا جائے گا۔ذرائع کا کہنا ہے کہ آمدنی کے مطابق ٹیکس ادا نہ کرنے والے افراد میں مختلف مارکیٹوں کے صدور، چیمبر آف کامرس اور انڈسٹری کے موجودہ اور سابقہ عہدیدار بھی شامل ہیں، جن کے خلاف ایف بی آر سخت کارروائی کرے گا تاکہ ٹیکس نیٹ کو مزید مضبوط کیا جا سکے۔
