وفاقی وزیر منصوبہ بندی پروفیسر احسن اقبال نے شاعر مشرق، مفکر پاکستان ڈاکٹر علامہ محمد اقبال کے مزار پر حاضری دی۔ اس موقع پر انہوں نے مزار پر پھولوں کا گلدستہ پیش کیا اور فاتحہ خوانی کی ہے۔
وفاقی وزیر احسن اقبال نے مہمانوں کی کتاب میں اپنے تاثرات بھی قلمبند کیے، جس میں انہوں نے علامہ اقبال کو خراج عقیدت پیش کرتے ہوئے ان کے افکار کو قومی رہنمائی کا سرچشمہ قرار دیا،وفاقی وزیر منصوبہ بندی احسن اقبال نے مزار اقبال پر میڈیا سے گفتگو کرتے ہوئے کہا کہ آج مفکر پاکستان کا 87 واں یوم وفات ہے۔پوری قوم کی طرف سے اُنکو خراج عقیدت پیش کرنے کے لئے آیا ہوں۔علامہ اقبال نے مردہ قوم کو شعور دیا اور پاکستان کا خواب دیکھا۔آج پاکستان میں جو فکری انتشار ہے اُسکی وجہ اقبال کے کلام سے دوری ہے۔حکومت اقبال کے فکر کو تعلیمی میدان کا حصہ بنائے گی۔جب 2027 میں علامہ اقبال کا 150 واں یوم پیدائش ہوگا تو بین الاقوامی سطح پر اقبال ڈے منائیں گے۔آج کے نوجوانوں کو اگر فکر اقبال سے روشناس کروائیں تو آج مذہبی انتہا پسندی سے دور ہوسکتے ہیں۔
