فلم ’گھبرانا نہیں ہے‘ کی شوٹنگ کورونا کی دوسری لہر کے باوجود سخت احتیاطی تدابیر کے ساتھ جاری

پاکستانی وزیر اعظم عمران خان کے مشہور جملے ’گھبرانا نہیں ہے‘ پر بنائی جانے والی فلم کی شوٹنگ رواں برس مارچ کورونا وائرس کی وجہ سے روک دی گئی تھی تاہم اب فلم کی شوٹنگ کا دوبارہ آغاز کردیا گیا اور فلم کی ٹیم کو اُمید ہے کہ اسے آئندہ سال کے وسط یا اختتام تک ریلیز کردیا جائے گا۔

باغی ٹی وی :میڈیا رپورٹس کے مطابق کورونا کی دوسری لہر کے باوجود سخت احتیاطی تدابیر کے ساتھ فلم ’گھبرانا نہیں ہے‘ کی شوٹنگ صوبہ سندھ کے دارالحکومت کراچی میں جاری ہے۔

فلم گھبرانا نہیں ہے‘ کی شوٹنگ اس وقت کراچی کے ضلع ملیر میں جاری ہے، جہاں پر فلم کے مرکزی اور اہم سین فلمائے جانے ہیں۔

فلم کی شوٹنگ، کہانی، اداکاری اور فلم سے وابستہ توقعات سے متعلق بات کرتے ہوئے فلم پروڈیوسر جبران بیگ نے بتایا کہ مذکورہ فلم صرف کامیڈی پر مشتمل نہیں ہے بلکہ یہ ایک اہم سماجی مسئلے پر مبنی ہے۔

انہوں نے بتایا کہ فلم کی کہانی خواتین کی خودمختاری اور خواتین کو طاقتور بنانے کے گرد گھومتی ہے اور فلم میں نہ صرف سماجی بلکہ سیاسی مسائل کو بھی منفرد اور ہلکے پھلکے انداز میں دکھایا گیا ہے فلم کی کہانی ایک بیٹی اور ان کے والد کے گرد گھومتی ہے اور ان کا خاندان جب مشکل میں پھنس جاتا ہے تو بیٹی والد کو کہتی ہیں کہ ’گھبرانا نہیں ہے‘ وہ مسئلے کو حل کرنے کے لیے موجود ہیں۔

فلم ’گھبرانا نہیں ہے‘ کی کاسٹ میں صبا قمر، سید جبران، زاہد احمد اور نیر اعجاز سمیت دیگر اداکار شامل ہیں جب کہ اس فلم کی ہدایات کے ذریعے ثاقب خان ڈائریکٹوریل ڈیبیو کریں گے۔

جبکہ فلم’گھبرانا نہیں ہے‘ کو نیوپلیکس سینما کے مالک، صنعت کار جبران بیگ پروڈیوسر حسن ضیا کے ساتھ پروڈیوس کر رہے ہیں-