جنوبی کوریا کے شہر پوچیون میں فوجی طیارے کی مشقوں کے دوران ایک افسوسناک حادثہ پیش آیا، جس میں ایک فائٹر جیٹ نے غلطی سے آ بادی والے علاقے پر بم گرا دیے۔ غیر ملکی میڈیا کے مطابق یہ واقعہ اس وقت پیش آیا جب جنوبی کوریا کی ایئر فورس کی مشقیں جاری تھیں۔
ایک ایف کے-16 فائٹر جیٹ طیارے کی جانب سے آ بادی والے علاقے میں 8 بم گرائے گئے۔ ان بموں میں سے سات بم دھماکہ کرنے میں ناکام رہے، تاہم ایک بم پھٹ گیا، جس کے نتیجے میں 15 افراد زخمی ہو گئے۔ زخمیوں میں سے 2 کی حالت تشویشناک بتائی جا رہی ہے۔رپورٹس میں مزید بتایا گیا ہے کہ بم گرنے کے باعث کچھ گھروں کو نقصان پہنچا ہے اور ایک چرچ بھی متاثر ہوا ہے۔ جنوبی کوریا کی ایئر فورس نے اس واقعے پر افسوس کا اظہار کیا ہے اور ساتھ ہی یہ اعلان کیا ہے کہ وہ متاثرہ افراد کو معاوضہ دینے کے لیے تیار ہیں۔ اس کے علاوہ، نا پھٹنے والے بموں کو ناکارہ بنانے کے لیے خصوصی ٹیمیں سرگرم ہیں۔جنوبی کوریا کی ایئر فورس نے واقعے کی تحقیقات کا آغاز کر دیا ہے اور اس بات کی وضاحت کی ہے کہ یہ حادثہ انسانی غلطی کی وجہ سے پیش آیا۔ ان کے حکام نے عوام سے تعاون کی اپیل کی ہے تاکہ اس کے اثرات کو جلد از جلد کم کیا جا سکے۔
اس واقعے پر مقامی شہریوں اور بین الاقوامی سطح پر تشویش کا اظہار کیا جا رہا ہے اور جنوبی کوریا کے حکام اس بات کو یقینی بنانے کے لیے اقدامات کر رہے ہیں کہ آئندہ اس طرح کے حادثات سے بچا جا سکے۔
